"Монгол Улсын дархан аварга" хэмээх эрхэм дээд цолыг хүртсэн цөөхөн хүчтэний нэг бол Б.Бат-Эрдэнэ аварга билээ. Өдгөө улс төрд хүч үзэж яваа ч цагтаа зүлэг ногоон дэвжээнээ хүч бяраа төдийгүй Монгол бөхийн ёс жудаг, эр хүний сайхан чанарыг гайхуулж явсан тэрбээр өчигдөр нутгийнх нь дүү, шавь Э.Оюунболд түрүүлсэнд хязгааргүй баяртай яваагаа нийгмийн сүлжээнд хуваалцжээ.

Өчигдөр тэрбээр нутгийн зөвлөлийн хамт шинэхэн аварга хүлээн авсан бөгөөд энэ үеэр Э.Оюунболдод хандан сургаалиа ч хайрласан байна.

Тэрбээр Хан Хэнтий нутгаас 63 жилийн дараа аварга болж байсан тухайгаа дурссан. Мөн 19 жилийн дараа дахин шинэ аварга төрж байгаад баярлаж байгаагаа илэрхийлээд цаашид ард олныхоо хайр хүндлэлийг дааж, аваргын нэрийг хамгаалж монгол бөхийн ёс жудаг, эр хүний сайхан чанарыг дээдэлж явахыг захив. 

Э.Оюунболд 14 настайдаа Б.Бат-Эрдэнэ аваргатай анх уулзаж хүсэл мөрөөдлөө учирлаж "Аварга" дээд сургуулийг дүүргэсэн түүхтэй.

Сонирхуулахад залуу аварга Э.Оюунболдын талаар баримтат нэвтрүүлгийг "Hero" интертайнмент бүтээж байгаа ажээ.