Олон улсын хөнгөн атлетикийн холбооноос зохион байгуулдаг 20 хүртэлх насны Залуучуудын дэлхийн аварга шалгаруулах тэмцээнд индонез хүү түрүүлж, эх орон ард түмнээ баясгажээ.

Тэрбээр Финландын Тампере хотод болсон Хөнгөн атлетикийн залуучуудын ДАШТ-ий гүйлтийн 100 метрийн төрөлд 10.18 секундийн амжилт гаргаж түрүүлсэн байна.  Өдгөө 18 настай Лалу Мухаммад Зохри 10.18 секундын амжилт гаргаснаар өөрийн болон үндэсний дээд амжилтаа шинэчлэн тогтоосон байна. Түүний араас АНУ-ын тамирчин Энтони Шварц, Эрик Харрисон нар 10.22 секундийн амжилттайгаар удаалжээ.

ДАШТ-ээс алтан медаль хүртсэн түүний энэ амжилт Индонезийн түүхэнд анхны тохиолдол болж, тус улсыг баяр хөөрөөр бялхуулсан байна.

Индонезийн зүүн нутгийн Ломбок аралд мод болон нэхмэл хулсаар хийсэн жижиг байшинд амьдардаг тэрбээр гүйлтийн зориулалттай гутал худалдан авах боломж бололцоо хомс нэгэн юм. Мөн тэрбээр сургагч багш авахаар эгчээсээ 400 мянган рупи гуйж байсан удаатай ажээ.

“Миний дүү Жакарта руу явахаасаа өмнө гүйлтийн гутал авах мөнгө өгөөч хэмээн надаас гуйж байсан. Би байгаа мөнгөө өгөөд явуулсан. Би дүүгээрээ их бахархаж байна” гэж түүний эгч Баик Фазила “kompas.com” цахим хуудсанд ярилцлага өгөхдөө дурджээ.

Лалу Мухаммад Зохри нь боломж бололцоо хомс ч гэсэн хүн хичээвэл юунд ч хүрч болно гэдгийг Индонез ч гэлтгүй дэлхий дахинд харуулж чадлаа.



Эх сурвалж: МОНЦАМЭ агентлаг

Share