Нийслэлийн Баянзүрх дүүргийн 12 дугаар хороо, Амгаланд баригдаж буй Анагаахын шинжлэх ухааны үндэсний их сургуулийн Монгол-Япон сургалтын эмнэлгийн барилга бүтээцийн үндсэн ажил дуусч, удахгүй ашиглалтанд орно. Эрүүл мэндийн сайд Д.Сарангэрэл өчигдөр тус сургалтын эмнэлгийн менежментийг хийж буй Токушима Их Сургуулийн Ирахара тэргүүтэй менежментийн баг болон АШУҮИС-ийн удирдлагыг хүлээн авч  уулзлаа.

Уулзалтаар өнөөг хүртэлх төслийн хэрэгжилтийн явцын талаар харилцан санал солилцож тулгамдаж буй асуудал, ялангуяа эмнэлгийн бүтэц зохион байгуулалт, эмнэлгийг ашиглалтад оруулахад чиглэсэн бэлтгэл ажлууд, хүний нөөц бүрдүүлэлт зэрэг өндөр түвшний эмнэлгийн тусламж үйлчилгээг үзүүлэх япон маягийн менежменттэй эмнэлгийн үйл ажиллагааг хангахад шаардлагатай асуудлуудын талаар ярилцлаа.

Уулзалтын үеэр Сайд Д.Сарангэрэл “Энэхүү эмнэлэг нь монголын ард түмэнд Япон стандартын эмчилгээ, үйлчилгээ, эрдэм шинжилгээ, сургалт явуулах үндэсний хэмжээний өндөр зэрэглэлийн эмнэлэг байх ёстой. Сургалтын эмнэлгийг байгуулснаар анагаах ухааны боловсролд нэн шаардлагатай эмнэл зүйн боловсрол олгох үйл ажиллагааг цогцоор нь шийдвэрлэж, боловсон хүчнийг үр дүнтэй бэлтгэх боломжтой болохын зэрэгцээгээр Монгол Улсын Засгийн газраас хэрэгжүүлж буй эрүүл мэндийн тусламж үйлчилгээг сайжруулахад өндөр ач холбогдолтой. Эмнэлгийн үйл ажиллагааг дэмжиж ажиллана.” гэдгээ илэрхийллээ.

Тус сургалтын эмнэлэг ашиглалтад орсноор жилд 2300 орчим мэс засал хийж, 192 мянган хүнд үйлчилэх юм байна.