Камеруны баруун нутгийн Баменда хотын дотуур байртай сургуулиас олон арван хүн барьцаалагдсаны дийлэнх нь сурагчид байгаа тухай телевизийн “BBC” суваг мэдээлэв.

Уг хэрэг нь даваа гарагийн өглөө “Баруун-Хойд” бүс нутгийн нийслэл хотод гарсан бөгөөд барьцаалагдсан хүмүүсийн дунд багаар тооцоолоход 79 сурагч, гурван том хүн байгаагийн дунд сургуулийн захирал багтаж байна гэж засаг захиргааны төлөөлөгч мэдээлжээ.

Бүс нутгийн захирагч Адольфе Леле Л’Африкюе энэ хэрэгт салан тусгаарлагчдыг буруутгаж байгаа юм.

Камеруны “Баруун-Хойд” болон “Баруун-Өмнөд” бүс нутагт сүүлийн жилүүдэд салан тусгаарлагчид бослого үймээн дэгдээх нь ихэсчээ. Босогчдын зорилго нь Англи хэлээр ярьдаг бүс нутгуудыг тусгаар тогтносон статустай болгох юм.

Одоогийн байдлаар аль нэг бүлэг Баменда хотын дунд сургуулийн хүүхдүүдийг барьцаалсан тухай мэдэгдэл хийгээгүй байгаа ажээ. Харин хүүхдүүдийн заримыг харуулсан дүрс бичлэг цахим сүлжээнд цацагдсан бөгөөд тэднийг барьцаалсан хүмүүсийн нэг нь уг бичлэгийг хийсэн хэмээн таамаглаж байна.

Дүрс бичлэгээс үзэхэд, бүх хөвгүүдийг жижиг өрөөнд суулгасан байсны зэрэгцээ бүгд маш их айсан харагдаж байжээ. Бичлэг хийсэн этгээд хүүхдүүдийг нэр болон хаанаас ирснээ хэлэхийг тушааж байсан байна. Түүнчлэн “Намайг сургууль дээрээ байхад “Амба хөвгүүд” энд авчирсан. Би хаана байгаагаа мэдэхгүй байна” гэдэг өгүүлбэрийг хүүхэд болгоноор хэлүүлжээ.

“Амба” хэмээх үг нь “Амбазониа” гэдэг үгийн товчлол бөгөөд салган тусгаарлагчид ийм нэртэй улс байгуулахыг хүсдэг юм байна. 



Эх сурвалж: МОНЦАМЭ агентлаг, BBC