Нийгмийн даатгалын ерөнхий газрын дарга Д.Зоригт БНСУ-ын элчин сайдын яамны нэгдүгээр нарийн бичгийн дарга бөгөөд консул Кил Канг Мүкийг хүлээн авч уулзан хамтран ажиллах талаар санал солилцлоо.

БНСУ руу зорчихоор виз мэдүүлж буй иргэдийн эдийн засаг санхүүгийн баталгааг лавлах зорилгоор Нийгмийн даатгалын шимтгэл төлөлтийн лавлагааг бүрдүүлэх материалын жагсаалтад оруулсан байдаг. Гэвч иргэд тус лавлагааг хуурамчаар үйлдэх нь хэвийн хэмжээнээс хэтэрсэн тул Нийгмийн даатгалын байгууллага болон цагдаагийн байгууллагад хандаад байгаа талаар Консул хэлсэн.

Хэдийгээр нийгмийн даатгалын байгууллагын дэмжлэгтэйгээр хуурамчаар лавлагаа үйлдсэн иргэдийг илрүүлж байгаа боловч тус асуудлыг бүр мөсөн таслан зогсоох тал дээр хоёр тал хамтран ажиллах боломжийг судлах хүсэлтэй байгаагаа тэрээр илэрхийлсэн.

Нийгмийн даатгалын ерөнхий газрын дарга Д.Зоригт "Ийм хэргийн улмаас хэд хэдэн бүлэг этгээд хуулийн байгууллага дээр шалгагдаж байгаа. Нийгмийн даатгалын лавлагаа, мэдээллийг хуурамчаар үйлдэж бичилт хийх, хэн нэгэн этгээд засвар оруулах боломжийг хаах зорилгоор лавлагааны маягтыг шинэчлэн өөрчлөлт оруулсан. Хамгийн гол хийгдэж эхэлсэн ажил бол танай ЭСЯ болон төлөөлөн гүйцэтгэх байгууллагад тус лавлагаа мэдээллийн үнэн зөв эсэхэд давхар хяналт тавих боломжийг олгож байна. Мэдээж иргэд даатгуулагчийн хувийн нууцтай холбоотой учир зөвхөн виз мэдүүлэгчийн лавлагааны кодоор ганцхан тэр хүний мэдээллийг л шалгах боломжтой. 

Мөн манай улсын эдийн засгийн байдалтай холбоотойгоор олон аж ахуйн нэгж өртэй гэж гарч байгаа. Энэ нь даатгуулагчийн буруу биш, ажил олгогчийн хариуцлагагүй байдалтай холбоотой тул ЭСЯ-ны зүгээс тус асуудалд уян хатан байдлаар хандаж цөөн сараар төлөлт хийгдээгүй тохиолдолд визний хүсэлтийг түдгэлзүүлэхгүй байхыг” хүслээ.

Лавлагаа мэдээллийг хуурамчаар үйлдсэн этгээдийн виз мэдүүлэх эрхийг хоёр жилээр хааж, Монгол улсын Эрүүгийн хуулийн дагуу хууль хяналтын байгууллага арга хэмжээ авч ажилладаг тул гэмт хэргийн шинжтэй тус үйлдэлд оролцохгүй байхыг иргэд, даатгуулагчид та бүхэнд анхааруулж байна.