Засгийн газрын өнөөдрийн хуралдаанаар Чингис хаан судлалын үндэсний хүрээлэн байгуулахаар шийдвэрлэжээ.
Энэ талаар Засгийн газрын Хэрэг эрхлэх газрын дарга Л.Оюун-Эрдэнэ "Чингис хаан судлалын үндэсний хүрээлэн байгуулснаар "Мянганы суут хүн-Чингис хаан"-ы Монголын болон дэлхийн түүхэнд оруулсан хувь нэмрийг гадаад, дотоодод дагнан сурталчлах, таниулах, Чингис хаан судлалыг Монгол судлалын бие даасан салбар шинжлэх ухаан болгон хөгжүүлэх боломжийг бүрдүүллээ.
Тус хүрээлэнд хийх ажил маш их байгаа. Олон ахиц дэвшил гарна гэж бодож байна. Төрийн нэгдсэн бодлого, зохицуулалттай болж байгаагаас гадна Монгол Улсад түүхэн аялал жуулчлал хөгжих боломж нэмэгдэх юм" хэмээн цахим хуудаснаа нийтлэжээ.
Сүүлийн үед Чингис хааныг өөрсдөөсөө гаралтай гэх зэргээр өмчлөх хандлагыг зарим улс орнууд ил тод илэрхийлэх болсон. БНХАУ-ын ӨМӨЗО гэхэд бодлогоор Чингис хаан судлалд онцгой анхаарч, их хэмжээний санхүүжилт гарган судалгааны олон чиглэлээр ажиллаж Чингис хаан судлалыг ӨМӨЗО-нд төвлөрүүлэх хандлагатай болсон. Дэлхий нийтэд ч Чингис хаан, 13-р зууны үеийн түүх, соёлын талаарх бодитой ойлголт хангалтгүй байгаа. АНУ-ын дунд сургуулиудад л гэхэд Хубилай хаан бол түүхэндээ Хятадын хаан байсан гэж зааж байна.
Чингис хааны өв, соёлын хүрээлэнтэй болсноор Чингис хааны нэр, хаяг, хөрөг зураг, хөшөө дурсгалын дүрсийг хэрхэн ашиглах асуудлыг ч хуульчлах боломжтой болох юм.
Энэ мэтээр олон жил яригдсан ч шийдэгдэлгүй өнөөг хүрсэн, Чингис хааны өв, соёлын хүрээлэн байгуулах бодитой олон шалтгаан байсан. Тиймээс энэ бүхнийг Засгийн газар харгалзан үзээд их хаантай холбоотой асуудалд Монгол төрийн нэгдсэн бодлого, зохицуулалттай болох, Чингис хаан судлаач гадаад, дотоодын түүхч, эрдэмтэн, судлаачдын оролцоог нэг чигт хандуулах зорилгоор энэхүү шийдвэрийг гаргасан гэхэд болно.
Өөр нэг чухал асуудал бол Монгол улсад түүхэн аялал жуулчлал хөгжүүлэх ЗГ-ын шийдвэр тус хүрээлэнд төвлөрч, бодит ажил болох юм.
ЗГ-ын 2017 оны 05 дугаар сарын сарын 10-ны өдрийн 142-р тогтоолоор баталсан “Хөгжлийн зам” үндэсний хөтөлбөрт “Мянганы суут хүн Их эзэн Чингис хаан” түүхэн аялал жуулчлалын үндэсний паркыг Хэнтий аймагт байгуулахаар, тус аймгийг түүхэн аялал жуулчлалын өлгий нутаг болгохоор тусгасан юм.
Тиймээс Монгол улсын 2018 оны төсвийн тухай хуулийн хүрээнд Чингис хот-Норовлин-Дадал чиглэлийн 250 км хатуу хучилттай авто зам барих, “Их Монгол улс, Монголын эзэнт гүрэн” цогцолборыг Биндэр суманд, “Хүлэгбаатар Боорчи-Андлалын өргөө” цогцолборыг Батноров суманд байгуулахаар болсон.
Мөн Чингис хааны төрсөн нутаг Дадал суманд “Мянганы суут хүн –Их эзэн Чингис хаан” төслийг Азийн хөгжлийн банкны санхүүжилтээр бүтээн байгуулахаар өнгөрсөн онд ЗГ-аас шийдвэр гаргасан бөгөөд эдгээр томоохон бүтээн байгуулалтын ажлууд өнөөдөр тухайн орон нутагт эхлээд явж байгаа билээ гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.
122.201.22.47
Хариулах 2021.04.11
Сайхан эерэг мэдээ байна. Бид XIII зуунд Эзэн Богд Чингис Хааны үед тухайн үеийн дэлхийг тэр чигээр нь эзэрхэж байлаа. Чингис Хаан өөрөө ч хэлж байсан: Энэ биеийн хүчээр бус Эрхэт Тэнгэрийн хүчээр эзэллээ гэж! Хэрхэхийг Мөнх Тэнгэр мэдэг гэж! Бид Эзэн Богд Чингис Хаан минь Эцэг Тэнгэрийн дор энэ ард түмнийг яаж хурааж явсан арга барилыг судлах маш чухал! 10-т, 100-тын дарга нар бол ардчилсан маягаар дороосоо, дотроосоо тухайн орон нутгийн хэсэг, хороо, баг, сумын иргэд өөрсдөө шийдэж сонгодог байсан. Харин 1'000-т, 10'000-тийн даргыг Чингис Хаан томилж, Ноён хэмээн цоллож байсан. Энэ л улс төрийн тогтолцоо Мөнх Тэнгэр шүтдэг улсад тохирно... Иймдээ ч бид дэлхийн дарга байсан юм шүү! Тэгээд яс үндэс, гарал угсаа энэ тэр гээд их юм байнаа! Том харж, Хожуу Их Монгол Улсыг байгуулах өгөөмөр зүрх сэтгэлтэй, тэнгэрлэг удирдагч байхын тулд нэгэн уужим сэтгэлтэй Улсын Их Аав байхын тулд ард түмнээ тийм ийм гарал үүсэлтэй гэж ялгалгүй бүх ястан үндэстэнд Эцэг шиг хайтай ханддаг тийм Хаан бол Чингис Хаан байсан гэдэг талаас нь судалж сурталчлах хэрэгтэй болов уу гэж мунхаглаж сууна даа! Чингис Хаан агуу! Түүний шүтэн биширч, мөргөн дээдэлдэг Мөнх Тэнгэр бүр ч аймшигтай хүчтэй!
0 0