Монголчуудын дундаж цалин 1 сая төгрөг давсан болохыг Үндэсний статистикийн хорооноос зарласан. Ийм хэмжээний цалинтай хүн 1 өдрийн орлого болох 44,444 төгрөгийг сар бүр өөрийнхөө ирээдүйд зориулан хураагаад байвал 20 жилийн хугацаанд 45 сая, 30 жилийн дараа гэхэд 160 сая төгрөгийн хуримтлалтай болох нь байна.

Толгой эргэм энэ тооцооллын үнэн бодит байдлыг харахын тулд хүү нь жилээс жилд хэрхэн өсдөгийг графикаар харуулъя.

Графикаас харахад эхний жилд 37 мянган төгрөгийн хүү таны дансанд нэмэгдэх бол сүүлийн 30 дахь жилд 18,2 сая төгрөгийн хүү бодогдон орох нь байна.

Сонирхолтой нь, энэ хугацаанд та нийтдээ 16 сая төгрөг хадгаламжиндаа хийх бол хүн амын орлогын албан татварт 16 сая төгрөг төлсөн байх болно. Татвар төлөгдсөний дараа таны дансанд нэмж орох хүү нь нийтдээ 144 сая төгрөг болох бөгөөд таны өөрийн хийсэн 16 сая төгрөгтэй нийлээд 160 сая төгрөгийн хуримтлалтай болох нь байна.

Хүүг тооцохдоо банкуудын өнөөдрийн хадгаламжийн дундаж хүү 14,2 хувиар тооцов (2018/09/25-ны байдлаар).

Нэг өдрийн цалин гэдэг нь таны сарын орлогын 5 хувь юм. Тэгвэл янз бүрийн цалинтай хүмүүс нэг өдрийн цалин буюу орлогынхоо 5 хувийг сар бүр хураагаад байвал 30 жилийн хугацаанд ямар хэмжээний хуримтлалтай болохыг доорх хүснэгтээс үзнэ үү. (Жилийн 14,2 хувийн хүүгээр тооцов)

Эндээс үзэхэд, 300 мянган төгрөгийн цалинтай хүн 48 сая, 700 мянган төгрөгийн цалинтай хүн 112 сая, 1 сая 500 мянган төгрөгийн цалинтай хүн 240 сая төгрөгийн хуримтлалтай болох боломжтой байна.

Гадаадын хүмүүс цалингийнхаа хэдэн хувийг өөрийнхөө ирээдүйд зориулан хадгалдаг болохыг нэгэн судалгаанаас харуулья.

Банкуудын хүүний мэдээллийг нэгтгэн харуулдаг Bankrate.com сайтын хийсэн судалгаагаар Америкчуудын 52 хувь нь орлогынхоо 5-аас илүү хувийг хадгалдаг бол 19 хувь нь огт хадгалдаггүй, 21 хувь нь 5 хүртэл хувийг нь хадгалж, хуримтлуулдаг ажээ. (дэлгэрэнгүйг доорх графикаас харна уу)

Хэдхэн жилийн өмнө Дэлхийн банкны хийсэн судалгаагаар энэ үзүүлэлтээр Хятадууд дэлхийд тэргүүлж байсан бөгөөд тэд орлогын 30 орчим хувийг ирээдүйдээ зориулан хадгалж, хуримтлуулдаг болох нь тогтоогджээ.

Тэгвэл та цалингийнхаа 5 хувийг өөрийн ирээдүйд зориулан хадгалж чадах уу? 95 хувиар нь өдөр тутмын амьдралаа залгуулаад явж болох уу? Энэ бол таны л шийдвэр.

Эцэст нь алдарт хөрөнгө оруулагч, дэлхийн тэргүүлэх баян хүн болох Warren Buffet-ын хэлсэн “Орлогынхоо дээжийг хадгалаад, үлдсэнг нь зарцуулж бай” гэдэг сургаалыг танд хүргэе.


Эх сурвалж: Хадгаламжийн даатгалын корпораци