Улаанбаатар хотын авто замын түгжрэлийг бууруулах нэг гарц нь стандартын шаардлага хангасан авто зогсоолын тоог нэмэгдүүлэх явдал гэж хотын удирдлагууд үзэж, 2016-2018 онд нийслэлийн нутаг дэвсгэрт байрлах улсын томоохон эмнэлгүүдийн гадна зогсоол болон нийтийн эзэмшлийн талбайд 40 гаруй талбайд авто машины зогсоолуудыг байгуулсан.

2016-2020 оны хооронд Улаанбаатар хотын нутаг дэвсгэрт байрлах томоохон 16 эмнэлгийн авто зогсоол, гадна иж бүрэн тохижилтын ажил хийж гүйцэтгэхээс, өнөөдрийн байдлаар 8 эмнэлгийн тохижилтын ажил бүрэн дуусч, 2 эмнэлгийн тохижилтын ажил дуусах шатандаа явж байна. Харин үлдсэн 6 эмнэлгийн тохижилтыг 2019 ондоо багтаан дуусгахаар ажиллаж байгаа юм байна. 

Гэвч нийтийн эзэмшлийн талбайд байгуулсан зарим авто зогсоолын үйл ажиллагаа эрхэлж буй ААН-үүд амралтын өдрүүдээр зогсоолоо хааж, байнгын үйл ажиллагаа явуулахгуй тохиолдлууд гарч байгааг иргэд НЗДТГ-т мэдээлэх болжээ. 

Дээрх үүссэн нөхцөл байдлыг хотын дарга анхааралдаа авч зарим төлбөртэй авто зогсоолуудын үйл ажиллагаанд шалгалт хийж, тэдгээрийн ажиллах цагийн хуваарьт өөрчлөлт орууллаа

Тухайлбал Сүхбаатарын талбайн урд талд авто зогсоолын үйл ажиллагаа явуулдаг “Ю Би Констракшн” ХХК-ийн ажиллах цагийн хуваарьт өөрчлөлт оруулж, зогсоолын үйл ажиллагааг 7 хоног тасралтгүй явуулах, ажлын өдрүүдэд өглөө 07.00-23.00 цаг, амралтын өдрүүдэд 08.00-22.00 цагийн хооронд иргэдэд үйлчилгээ үзүүлж байхаар захирамж гаргалаа. 

Уг зогсоол нь хотын төвд байрлах хамгийн том буюу 200 авто машины багтаамжтай зогсоол хэдий ч амралтын өдрүүдээр үйл ажиллагаагаа зогсоож, машин зогсоолдоо оруулахгүй, иргэдийг бухимдуулах болсон учир хотын дарга дээрх захирамжийг гаргаж, иргэдэд үйлчлэх цагийн хуваарьт нь өөрчлөлт оруулсан байна. 

Цаашид төр, хувийн хэвшлийн түншлэлээр стандартын шаардлага хангасан, борооны ус зайлуулах шугам, гэрэлтүүлэг, сандал, явган замтай иж бүрэн авто зогсоолын тоог нэмэгдүүлж, байнгын үйл ажиллагаатай байх журмыг хэвшүүлж ажиллана гэдгээ хотын дарга мэдэгдсэн юм.