Сонгуулийн Ерөнхий Хороо УИХ-ын сонгуулийн 42 дугаар тойргийн нөхөн сонгуульд оролцох намуудыг бүртгэх эсэх тухай шийдвэр асуудлыг хэлэлцэн шийдвэрлэжээ.

Сонгуульд оролцох тухай хүсэлтээ ирүүлсэн улс төрийн 13 намын баримт бичгийг Сонгуулийн тухай хуулийн 124 дүгээр зүйлд заасны дагуу нягтлан шалгасан дүнг авч хэлэлцээд хуульд заасан шаардлагыг хангасан 11 намыг УИХ-ын сонгуулийн 42 дугаар тойргийн нөхөн сонгуульд оролцуулахаар бүртгэсэн тухай тогтоолыг баталсан байна. 

Нэр дэвших ажиллагаа санал авах өдрөөс 37 хоногийн өмнө эхэлж, тав хоногийн дотор дуусгавар болох юм. Сонгууль болохоос 22 хоногийн өмнө буюу зургадугаар сарын 4-нд нэр дэвшигчийн үнэмлэхийг гардуулна. Харин сонгуулийн сурталчилгаа одоогийн хуулийн дагуу 18 хоног үргэлжлэх аж.

Улмаар Хэнтийн нөхөн сонгуульд оролцуулахаар бүртгэсэн дараах 11 намд  өнгөрсөн баасан гарагт батламжийг нь гардуулан өглөө.   

  1. Хөдөлмөрийн Үндэсний Нам
  2. Ард Түмний Олонхийн Засаглал Нам
  3. Монголын Ногоон Нам
  4. Эрх Чөлөөг Хэрэгжүүлэгч Нам
  5. Ардчилсан Нам
  6. Монгол Ардын Хувьсгалт Нам
  7. Монгол Ардын Нам
  8. Дэлхийн Монголчууд Нам
  9. Монгол Консерватив Нам
  10. Зон Олны Нам
  11. Үнэн Ба Зөв Нам

Харин Иргэний Зориг Ногоон Нам нь Монгол Улсын Их Хурлын 2016 оны ээлжит сонгуулийн зардлын тайлан, холбогдох бусад баримт бичгийг Сонгуулийн тухай хуулийн 57 дугаар зүйлийн 57.3 дахь хэсэгт заасан хугацаанд ирүүлээгүй тул мөн хуулийн 60 дугаар зүйлийн 60.5 дахь хэсэгт заасныг үндэслэн нөхөн сонгуульд оролцуулахаар бүртгэхээс татгалзсан шийдвэр гаргав. Түүнчлэн Монголын Хүний Төлөө Нам нь Сонгуулийн тухай хуулийн 121 дүгээр зүйлийн 121.3.6 дахь заалтад дурдсан баримт бичгийг дутуу ирүүлсэн тул мөн хуулийн 124 дүгээр зүйлийн 124.3.2 дахь заалтыг үндэслэн сонгуульд оролцуулахаар бүртгэхээс татгалзсан шийдвэр гаргажээ.