АНУ-ын Ерөнхийлөгч Дональд Трамп ирэх долоо хоногт цагаачлалын цогц зарлигт  гарын үсэг зурах гэж байгаагаа пүрэв гарагт мэдэгдэв. 

“Бид гүйцэтгэх зарлигийг ирэх долоо хоногт батлахаар бэлдэж байна. Энэ тогтоол нь бүх талын асуудлыг хамарсан маш цогц шинжтэй байх болно” гэж Трамп Цагаан ордонд АНУ-ын цагаачлалын бодлогын асуудлаар сэтгүүлчдэд зориулсан хэвлэлийн бага хурлын үеэр онцлон тэмдэглэжээ. Тэрбээр зарлигийн талаар өөр тодорхой мэдээлэл өгөөгүй байна. Үүний сацуу, Америкийн удирдагч хууль бусаар хил давсан дүрвэгсдэд тус улс цагаачлах эрх олгохгүй гэдгийг цохон тэмдэглэжээ. 

Тэрбээр Латин Америкийн орнуудын цагаачдын АНУ-ын нутаг дэвсгэрт нэвтрэх төлөвлөгөөг дахин эрс шүүмжилсэн байна. “Хууль бус цагаачдын энэ цувааг АНУ-д нэвтрүүлэхгүй. Тэд нутаг руугаа буцах үүрэгтэй. Учир нь тэд цагаа дэмий үрж байна. Манай улсад орохын тулд тэд заавал мэдэгдэл өгөх ёстой” гэж Трамп хэлсэн байна. Үүний сацуу тэрбээр дүрвэгсдэд эдийн засгийн цагаачлалын эрх олгохгүй гэдгийг нэмж хэлжээ. 

Америкийн хил рүү илгээсэн цэргүүд цагаачид руу гал нээх үү? гэсэн сэтгүүлчдийн асуултад хариулахдаа, Трамп “үгүй байх гэж найдаж байна” гэжээ. Гэхдээ тэрбээр цагаачид чулуу хэрэглэхийг галт зэвсэг хэрэглэсэн гэж үзнэ гэдгийг нэмж хэлсэн байна. 



Эх сурвалж: МОНЦАМЭ агентлаг, TASS

Share