Египетийн нийслэл Каир хотын галт тэрэгний төв буудалд гал гарсны улмаас 25 хүн амиа алдаж, 50 гаруй хүн бэртэж гэмтжээ. Энэ тухай тус улсын үндэсний телевиз мэдээлжээ.

Үндэсний төмөр замын захиргаанаас мэдээлснээр, галт тэрэг Каир хотын төвд орших “Ramses” галт тэрэгний буудлын төмөр зам хязгаарлагч бетон хашлагыг мөргөсөн байна. Ослын дараа түлшний саванд дэлбэрэлт болсон аж.

Египетийн Ерөнхий сайд Мустафа Мадбули осол болсон газарт очиж, сэтгүүлчдэд ярилцлага өгөхдөө, “галт ямар учраас мөргөлдсөн болохыг хараахан тогтоогүй байна” гэж дурдаад, “ажил үүрэгтээ хайхрамжгүй хандсан хүмүүсийг олж, хариуцлага хүлээлгэнэ” хэмээн мэдэгджээ.

Тус улсын галт тэрэгний хөдөлгөөн зохицуулах тогтолцооны аюулгүй байдал хангалтгүй байгаа талаар хэвлэлүүд сүүлийн жилүүдэд ихээхэн шуугиж, шүүмжилж байгаа юм.

Өмнө нь 2017 онд Газар дундын тэнгисийн Александрия боомт хотын захад явж байсан зорчигч тээврийн хоёр галт тэрэг мөргөлдсөний улмаас 43 хүн амиа алдаж, 100 гаруй хүн гэмтсэн хэрэг гарсан билээ. Үүний өмнө 2002 онд нийслэл Каир хотын галт тэргэнд гал гарсны улмаас 373 хүн амиа алдсан нь тус улсын түүхэн дэх хамгийн эмгэнэлтэй осол болон тэмдэглэгджээ.



Эх сурвалж: МОНЦАМЭ агентлаг, BBC