Шведийн тавилга үйлдвэрлэгч “IKEA” компанийн Их Британийн нийслэл Лондон хотноо байгуулсан дэлгүүрүүд ихээхэн амжилт олсноос улбаалан тус улс даяарх жижиг дэлгүүрүүдийн тоогоо нэмэгдүүлэхээр төлөвлөж байгаа тухай компанийн төлөөлөгч мэдээлэв.

Тус компанийн Их Британи дахь салбаруудыг хариуцсан захирал Хавьер Кинонесийн мэдэгдсэнээр, Лондонгийн салбар нь туршилтын нэг хэсэг байсан бөгөөд үүнээс харахад бусад хотуудад салбаруудаа нээн, үйл ажиллагаагаа өргөжүүлэх ихээхэн боломжтой нь ажиглагдсан аж.

Жижиг дэлгүүрүүдийг олноор нээснээр хэрэглэгчид тавилга сонгох хийгээд дотоод заслын талаарх зөвлөгөө авахын тулд төвийн дэлгүүрүүдийг зорих шаардлагагүй болох юм.

Энэ оны наймдугаар сарын 31-ний байдлаар компанийн Их Британи дахь салбаруудаас олсон орлогыг өмнөх оны мөн үетэй харьцуулахад 5.9 хувиар өсч 1.96 тэрбум фунт хүрчээ.

Мөн тус компанийн албан ёсны цахим хуудсаар 200 орчим сая хүн зочилсон нь 13.4 хувиар өссөн үзүүлэлт болсны зэрэгцээ хэрэглэгчдийн цахимаар захиалан авсан худалдан авалтын тоо ч ихээхэн нэмэгдэх болжээ.

Шведийн үндэстэн дамнасан “IKEA”  корпораци нь шууд угсрах боломжтой тавилга, гал тогооны хэрэгсэл болон гэрийн чимэглэлүүдийг үйлдвэрлэн худалдаанд гаргадаг билээ.



Эх сурвалж: МОНЦАМЭ агентлаг, BBC.com