Өнгөрсөн ням гарагт Японы хойд нутгийн Хоккайдо арлын Саппоро хот дахь нэгэн зоогийн газарт гал түймэр гарсны улмаас 42 хүн гэмтэж бэртсэн байна.

Түймэр Саппоро хотын төвөөс баруун өмнөд зүгт 3 километр зайд оршдог зоогийн газарт оройн 20:30 цагийн орчимд гарсан бөгөөд ослын шалтгааныг хий алдсантай холбоотой байж магадгүй хэмээн цагдаагийн ажилтнууд таамаглаж байгаа ажээ.

Хоёр давхар барилга маш ноцтой сүйдсэн бөгөөд гал сөнөөгчид түймрийг унтраахад 5 цаг гаруйн хугацаа зарцуулсан байна. Түймэр гарсан зоогийн газар байрладаг Тоёхира дүүрэгт зоогийн болон цэнгээний олон газар үйл ажиллагаа явуулдаг юм.

Дахин гал түймэр гарч, хүмүүс бэртэхээс урьдчилан сэргийлэх зорилгоор цагдаагийн газрын мэргэжилтнүүд зоогийн газрын ойролцоох газарт хамгаалалтын тууз татжээ. 



Эх сурвалж: МОНЦАМЭ агентлаг, CNN