СӨҮЛ. /Yonhap/. Солонгосын дайны үеэр салан тусгаарлагдсан гэр бүлийн гишүүдийг дүрс бичлэгээр уулзуулах тухай ажлын түвшний хэлэлцээ хийх саналыг БНАСАУ-ын талд тавихад бэлэн болсон гэж БНСУ-ын Улс үндэстнээ нэгтгэх яам мэдэгдлээ.


БНАСАУ-ын эсрэг авсан хориг арга хэмжээг түр зөөлрүүлж, тус улс руу дүрсээ харж дуудлага хийх техник хэрэгслүүдийг илгээх шийдвэрийг НҮБ-ын Аюулгүйн зөвлөл болон АНУ саяхан гаргасан байна.


“Тусгаарлагдсан гэр бүлүүдийг дүрс бичлэгээр уулзуулах тухай холбогдох газар, агентлагуудтай хэлэлцэж дууссаны дараа БНАСАУ-тай ажлын түвшний хэлэлцээг өрнүүлнэ” гэж Улс үндэстнээ нэгтгэх яамны хэвлэлийн албаны төлөөлөгч мэдээлжээ.


“Бид дэлгэцнүүд болон бусад төхөөрөмжийг худалдаалахаар бэлтгэж байгаагийн зэрэгцээ уулзалтыг зохион байгуулах 13 газрыг шалгаж байна. Технологийн шинэчлэлт болон засварын ажлыг удахгүй эхлүүлнэ” гэж яамны мэдээнд тэмдэглэсэн байна.


Өнгөрсөн хоёрдугаар сарын эхээр Цагаар сарын баярын амралтыг тохиолдуулан салан тусгаарлагдсан гэр бүлийн гишүүдийг дүрс бичлэгээр уулзуулах санааг БНСУ-ын тал гаргасан боловч БНАСАУ-ын хувьд техникийн дутагдалтай байсан юм.


БНСУ-ын Ерөнхийлөгч Мүн Жэ Ин болон БНАСАУ-ын удирдагч Ким Жөн Ун нар өнгөрсөн оны есдүгээр сард уулзах үеэрээ тусгаарлагдсан гэр бүлүүдийг дүрс бичлэгээр уулзуулж, дүрстэй зурвас илгээх боломжоор хангахад хүчин чармайлт гаргахаар тохиролцсон билээ. 

Эх сурвалж: Монцамэ агентлаг

Share