Төрийн тусгай албан хаагчдын нэгдсэн эмнэлэг /ТТАХНЭ/-ийн шинэ байрандаа анх удаагаа энэ сарын 6-нд үений дурангийн хагалгааг амжилттай хийсэн байна.

Ийм хагалгааг тус эмнэлэгт 4 жилийн өмнө хийж байжээ. Харин өнөөдөр Австри улсын Засгийн газрын хөнгөлөлттэй зээлийн 7 сая еврогийн санхүүжилтээр ламнари агаарын урсгалтай өндөр түвшний хагалгааны вакум 4 өрөө бүхий орчин үеийн эмчилгээ оношлогооны бүрэн тоног төхөөрөмжтэй болоод байгаа юм.

Энэ өдөр 36 настай эмэгтэй тамирчны спортын гэмтлээс үүдэлтэй өвдөгний урд жийргэвч мөгөөрсний чагтан холбоосыг сэргээх хагалгааг ийнхүү шинэхэн эмнэлгийнхээ Гэмтэл согог судлалын тасаг /ГСЗТ/-т анх удаагаа хийжээ. ТТАХНЭ нь цаашдаа эмч нараа дадлагажуулах, бие дааж хагалгаа хийх зорилгоор ГССҮТ-ийн эмч нартай үений дурангийн аппаратаа ашиглаж уг хагалгааг хамтран хийсэн байна. Тухайлбал, ГССҮТ-ийн захирал, доктор Т.Мөнхсайхан% мэс заслын эмч С.Батсүх болон ГССТ-ийн эмч, сувилагч асрагч нараас бүрдсэн 7-8 хүний бүрэлдэхүүнтэй баг ажиллажээ.  

Манай улсад энэ төрлийн хагалгааг БНСУ-ын эмч нартай хамтарч цөөн тооны хувийн эмнэлгүүдэд өндөр өртөгтэй хийдэг. Харин улсын эмнэлгүүдээс ГССҮТ-ийн эмч нар түлхүү хийж байгаа юм.  ТТАХНЭ нь спортын гэмтлийн чиглэлээр ажиллах бөгөөд тамирчдад тохиолддог шөрмөсний болон холбоосны  гэмтлүүдэд хагалгаа хийхээр төлөвлөөд ажиллаж байгаа юм. Мөн тус эмнэлэг цаашдаа иргэдэд 24 цагийн гэмтлийн тусламж үйлчилгээ үзүүлдэг болно.

Дашрамд дуулгахад, манай улсаас үений дурангийн хагалгаанд орохоор жилд дунджаар 1000 орчим хүн гадаад орныг зорьдог бөгөөд нэг хүний эмчилгээний зардал 10 орчим сая байдаг аж. Харин дотооддоо хямд өртөгтэй хийдэг. Эрүүл мэндийн даатгалын сангаас төлбөрийн 75 хувийг гаргаж байгаа юм. Дурангийн хагалгаа нь өвдөлт зовиур бага, эдгэрэлт түргэн бөгөөд орчин үеийн мэс заслын шилдэг технологид тооцогддог байна.  



МОНЦАМЭ

Share