Засгийн газрын өнөөдрийн хуралдаанаар гаргасан зарим шийдвэрийг холбогдох албаныхан танилцууллаа.

Энэ үеэр Сангийн сайд Б.Жавхлан "Засгийн газар коронавирусийн эсрэг вакцинжуулалтад онцгой анхаарч, татан авалт хангалттай хэмжээнд хүрсэн. Гэвч сүүлийн өдрүүдэд Улаанбаатарт иргэдийн вакцинд хамрагдах идэвх эрс суларсан. Өдөрт 60 мянга гаруй иргэн хамрагддаг байсан бол өчигдрөөс 40 мянга болж буурлаа. 

Вакцинд хамрагдах эсэх нь сайн дурын асуудал ч цар тахал дэлхийн хүн төрөлхтнийг маш том эрсдлийн өмнө аваачсан учир хүн бүрийн хариуцлага яригдаж байна. Хүний эрхийн асуудал гэж ярих хүмүүс бий. Гэхдээ вакцинд хамрагдаагүй иргэдийн өмнөөс нийгэм тэр чигээрээ эрсдэлд орж болохгүй.

Иймд Засгийн газрын өнөөдрийн хуралдаанаар вакцинжуулалттай холбоотой 2 чиглэлийн арга хэмжэ авахаар шийдвэрлэлэээ.

1. Вакцинжуулалтад хамрагдаагүй иргэдэд тодорхой албадлагын арга хэмжээ авна

Улаанбаатарт хүнсний талон авдаг 18-аас дээш насны 47 мянган иргэн байна. Үүнээс 29 мянга нь нэг ч тун вакцин хийлгээгүй. Мөн Улаанбаатарт төрөл бүрийн халамж авдаг нийт 211 мянган иргэн бий. Өчигдрийн байдлаар тэдний 80 мянга нь вакцинд хамрагдаагүй байна. Тиймээс өнөөдрөөс эхлээд дараагийн саруудад олгох бүх төрлийн халамж, хүнсний талоныг вакцин хийлгээгүй иргэдэд олгохгүй.

2. Вакцины 2 тунгаа хийлгэсэн иргэдэд 50.000 төгрөгийн урамшуулал олгоно

Бүрэн тунгаа хийлгэсэн иргэдэд вакцины үр дүнг хамгаалах, дархлааг нь хадгалах, сэргээх зорилгоор 50.000 хүртэлх төгрөгөнд витаминжуулалтын багц олгохоор бэлдэж байсан. Гэвч бүрэн тунгаа хийлгэсэн иргэдээ урамшуулах зорилгоор 50.000 төгрөгийг бэлэн мөнгөөр олгохоор шийдвэрлэлээ.

Иргэд өөрийн эрх, үүрэг, нийгмийн хариуцлагаа ухамсарлаж, гэр бүл, хайртай хүмүүсийнхээ төлөө яаралтай, нэг өдөр, цагийн өмнө вакцинаа хийлгэх шаардлагатай байна. Бид дахин хөл хорио тогтоохыг хүсэхгүй байна. Гэвч улаан дээсэн дээгүүр алхаж болохгүй. Амь наснаас үнэтэй эдийн засаг гэж байхгүй. Тиймээс аль болох богино хугацаанд хэвийн амьдралдаа шилжихийн тулд эдгээр арга хэмжээг авч байна" хэмээлээ.