Он гарсаар улсын хэмжээнд 04 дүгээр сарын 15-ны байдлаар нийслэл Улаанбаатар хот, Булган, Дорнод, Дорноговь, Дархан-Уул, Сэлэнгэ, Сүхбаатар, Төв, Хөвсгөл, Хэнтий аймгийн 26 суманд нийт 33 удаагийн ой, хээрийн  түймэр гарсан байна. Түймрийн улмаас урьдчилсан байдлаар 1,1 мянган га ой, 1,8 мянган га хээрийн талбай, нийт 2,9 мянган га талбай шатжээ.

Дээрх түймрийн голомтод Онцгой байдал, Хил, Цагдаагийн байгууллага болон орон нутгаас нийт 1590 гаруй хүн, 2 нисдэг тэрэг, 191 автомашин, 13 мотоцикль, 54 морьтойгоор ажилласан байна.

Харин өнөөдрийн байдлаар Сэлэнгэ аймгийн Мандал, Дорнод аймгийн Баян-Уул, Булган аймгийн Хутаг-Өндөр, Могод суманд гарсан түймрийн тархалтыг зогсоож, цурманд оруулан бүрэн унтраахаар ажиллаж байна. 

Түймрийн голомтод Онцгой байдлын байгууллага, Хилийн цэрэг, Цагдаагийн байгууллага, дархан цаазат газар болон сум, орон нутгаас нийт 300 гаруй хүн, 40 орчим техник хэрэгсэлтэйгээр ажиллаж байна гэж Онцгой байдлын ерөнхий газраас мэдээллээ.

Сэлэнгэ аймгийн Цаг уур, орчны шинжилгээний газрын дарга А/65 тоот тушаал гаргаж, цаг агаарт зориудаар нөлөөлөх арга хэмжээ авч эхэлжээ. Тус аймгийн Ус, цаг уур, орчны шинжилгээний газрынхны мэдээлснээр “Бороо-1, 2” экспедиц энэ сарын 5, 11-нд Хушаат сумын Ногоон хунх, Түшиг сумын Хавтгай овоо зэрэг газарт цаг агаарт зориудаар нөлөөлж, үүл буудсан гэнэ.

Сэлэнгэ аймгийн зарим нутгаар энэ хавар хуурайшилт маш их, хур тунадасны хэмжээ олон жилийн дунджаас бага байгаа аж. Тиймээс цаг агаарт зориудаар нөлөөлөх аргыг цаашид үргэлжлүүлэн хэрэгжүүлэхээр төлөвлөжээ.