Санта Анагийн хар салхины нөлөөгөөр Калифорнид урьд өмнө нь тохиолдож байгаагүй аюултай ой хээрийн түймэр дэгдээд байгаа юм. Мэргэжлийн байгууллагаас хүчтэй салхи болон чийгийн дутмаг байдлаас үүдэж галт түймэр ойрын гурван өдрийн турш үргэлжлэх төлөвтэй байна хэмээн мэдэгдсэн байна. Үүний улмаас зарим нутгаар лхагва гариг хүртэл онц байдал зарлажээ. 

Одоогийн байдлаар гал сөнөөгчид Палисэдсийн 23,000 гаруй акр талбайг хамарсан түймрийн 14 хувийг, Итоны 14,000 гаруй акр талбайн 33 хувийг унтрааж чадсан бол Херстийн 799 акр талбайн түймрийг бүхэлд нь унтрааж чаджээ. 

“Cal Fire” ойн аж ахуй, гал түймрээс хамгаалах газрын дэд захирал Брис Беннетт өнгөрсөн ням гаригт CNN-д яриа өгөх үеэрээ 

“Бидэнд гал сөнөөгчид болон ус байгаа. Харин хамгийн хэрэгтэй байгаа зүйл нь цаг хугацаа” гэжээ. 

Түймрийн гол шалтгааныг одоогийн байдлаар оновчтой тогтоогоогүй байгаа ч мэргэжилтнүүдийн таамаглаж буйгаар Лос Анжелес хотод өнгөрсөн 10-р сараас хойш бороо багатай байсан бөгөөд үүн дээр Санта Анагийн салхины нөлөө ихээхэн байгаа юм. 

Энэхүү галт түймэр нь Лос Анжелес хотын 40,000 акр талбайг талбайг хамарч, 12,300 гаруй барилга байгууламж сүйдсэний сацуу 24 хүн амь эрсэджээ. Тиймээс тус хотын 105,000 оршин суугчдыг нүүлгэн шилжүүлэх ажил өрнөж байна. 

Амь эрсэдсэн хүний тоог 24 гэж тогтоогоод байгаа ч түймэр илүү газар авч, барилга байгууламж ихээр сүйдэж байгаа тул амиа алдагсдын тоог тодорхой гаргах боломжгүй байгаа тухай албаныхан мэдээлсэн байна. 

Энэхүү харамсалтай явдал нь дэлхий даяар эмзэглүүлж байгаа бөгөөд түймрийн улмаас амиа алдагсдын гэр бүлийнхний хувьд их хүнд цохилт боллоо. 

Мөн нас барагсдын ар гэрийнхний өгсөн яриаг тухайлбал, Энтони Митчеллийн 67 настай аав нь хөлөө тайруулсны улмаас тэргэнцэр хэрэглэдэг байсан ба Энтонигийн дүү болох Жастин Митчелл тархины саажилтын улмаас алхаж чаддаггүй байжээ. Тэд гал түймрийн улмаас Алтаденад байрлах гэртээ нас барсан байна. Энтони энэ тухайд “Аав минь өөрөө гаргаж чадах байсан ч дүүг минь орхиогүй. Тэр хүүхдүүддээ ийм л хайртай хүн байсан” хэмээн ярьсан байна. 

Энэ мэтчилэн олон хүмүүс хайртай дотны хүмүүсийнхээ араас гашуудаж байгаа юм. 

Харин ой хээрийн амьтдад юу тохиолдох вэ?

Гэрийн тэжээвэр амьтдын хувьд эзэдтэй нь хамт нүүлгэн шилжүүлдэг бөгөөд тэд хоргодох байранд аюулгүй байх боломжтой байдаг. Калифорнийн Хүнс, Хөдөө Аж Ахуйн Газрын (CDFA) амьтдын яаралтай тусламжийн газар онцгой байдал болон гамшгийн үед бэлтгэлтэй байдаг аж. Харин зэрлэг амьтдын хувьд гамшиг тохиолдоход харьцангуй эрсдэл бага байдаг ч их хэмжээний түймэр гарсан үед хоргодох газар олоход бэрхшээлтэй болдог байна. Мөн одоогийн байдлаар түймрийн улмаас үрэгдсэн амьтдын тоо толгойг нарийн гаргах боломжгүй юм. 

Гал түймэр нь ой мод, ургамал, усны эх үүсвэрийг устгаж, амьтдын бэлчээр, хоол тэжээл, усан хангамжийг тасалдуулдаг. Улмаар ойн амьтад шилжин нүүхээс өөр аргагүйд хүрдэг бөгөөд энэ нь тэдний үржил, амьдрах орчныг нь доройтуулдаг байна.

Эх сурвалж:

BBC.com

nbcnews.com