Тэрбээр уг ярилцлагаар Монгол Улсын Ерөнхийлөгч болсноосоо хойш гаргасан зарим санал, шийдвэр, хэрэгжүүлсэн үйл ажиллагаанууддаа тайлбар өглөө. 

Ерөнхийлөгч гадаадад айлчиллаа гэхэд тэр улсын эдийн засаг, тэр хүн хэн бэ гэдэг цаас танилцуулгаараа нөгөө улсынх нь Ерөнхийлөгчид очдог. Ядуурал нь тэд, авлигалд идэгдчихсэн гэсэн танилцуулга урд нь ирчихсэн байхад үнэтэй зангиа зүүчихсэн, үнэртэй ус үнэртүүлсэн нэг тийм ганган хүн очоод яриад байхаар өмнөөс нь санаа зовдог биз дээ. Ийм санаа зовсон бодол миний өмнөх  Ерөнхийлөгчийн үед надад буудаг байсан юм. 

Монгол Улсын Ерөнхийлөгч Х.Баттулга АНУ-д айлчилж,  тус улсын Конгрессын гишүүд, засаг захиргааны төлөөлөгчидтэй хийсэн уулзалт. 2019.08.02

"ОХУ-ын Ерөнхийлөгч В.Путиныг Монголд айлчлах үед би газрын зураг барьж ороод хийн хоолойг Монголоор дайруулах санал тавьж, Саяны нурууг дагуулж хүнд нөхцөлд тавихын оронд төмөр замаа дагуулаад тавих тооцооллыг танилцуулсан". гэлээ. 

Монгол Улсын Ерөнхийлөгч Халтмаагийн Баттулгын урилгаар ОХУ-ын Ерөнхийлөгч Владимир Владимирович Путин Монгол Улсад 2019 оны 9 дүгээр сарын 3-нд албан ёсоор айлчилсан.

Мөнгө өгөөд л сонгуульд оролцдог. Сонгууль хуурамч болоод байна. 100 жилийн түүхтэй МАН-ын байрыг харчих. 30 жилийн түүхтэй АН-ын байрыг харчих. Нөгөө гучин гаруй намуудынхаа байрыг харчих. Ингээд ирэхээр шударга өрсөлдөөн байхгүй. Сонгуулиар хэний ч танихгүй хүн УИХ-д сонгогдож гарч ирээд байгаа биз. Тэр хүн яаж гарч ирж байна гэхээр мөнгөөр л гарч ирж байгаа юм. Шударга өрсөлдөөн байхгүй учраас шударга сонгууль байхгүй. 

Х.Баттулга "Өөрчлөлтийг сонгуулиар хийдэг ардчиллын алтан зарчим бий." 2020 он

Ерөнхий сайдыг огцрохоо зарлах хүртэл би энэ шийдвэрийг нь мэдээгүй байсан. Ерөнхий сайд төрийн эргэлт хийх гэж байна гэж хэлсэн. Гэтэл Ерөнхий сайдыг тойрсон бүтэц нь бусдын гар хөл байсан. Ерөнхий сайдад буруу мэдээлэл өгсөн. Ерөнхий сайд У.Хүрэлсүх "үргээлгэнд" орсон. 

МАН-ыг тараах захирамж гаргсан тухайгаа тэрбээр "Бүх намууд нэг гараанаас дахин эхлэх хэрэгтэй гэсэн үндсээр Ардын намыг тараах асуудлыг хөндөж, Улсын дээд шүүхэд хандсан." гэж тайлбарлалаа. 

Монгол Улсын Ерөнхийлөгч Х.Баттулга "Монгол ардын намыг тараах тухай" захирамж гаргаснаа мэдэгдэж, өөрийн биеэр уншин танилцуулсан юм. 2021.04.19

Оффшор бүсэд хууль бусаар гарчихсан 4 их наяд төгрөг байгаа. Үүнийг оруулж ирэх төрийн данс байхгүй. Энэ дансыг УИХ-аар хэлэлцүүлж нээдэг. Энэ дансыг нээж өгөхгүй өнөөдрийг хүрсэн.

Тавантолгой-Зүүн баян чиглэлийн төмөр замыг тухай тэрбээр "Монголчууд төмөр замаа барьснаар  түүхийг өөрсдөө бүтээлээ" гэв.

Тавантолгой-Зүүнбаян чиглэлийн 416.1 км  төмөр замын дээд, доод бүтцийн ажил дуусаж, энэ сард хүлээлгэн өгнө.

Халуун сэтгэлийн илрэл гэж үзээд халуун хошуутай мал бэлэглэхээр шийдээд 30 мянган хонь өгөхөөр Аюулгүй байдлын зөвлөл дээр шийдвэрлэсэн.

“Монголоос хандивласан хонь” гэсэн шошго бүхий 308 хайрцагт савласан хонины махыг 2020.12 сард БНХАУ-ын  Хайнань мужийн эмнэлгийн 865 эмч ажилтанд гардуулжээ.

Сүүлийн хэд хоног Монгол Улсын Ерөнхийлөгчийн зарлигаар шагналын хур буусан өдрүүд байлаа. Цахим орчинд түүнийг гайхсан, шүүмжилсэн хүмүүс цөөнгүй байв. Харин энэ талаар тэрбээр " Цар тахлаас болоод 2 жил гаруй шагнал гардуулах ажил зогссон байсан. Хөл хорио тавигдсан учраас хүлээгдсэн байсан шагналуудыг одоо гардуулж байгаа" гэсэн .

Ярилцлагын төгсгөлд сэтгүүлч Л.Мөнхбаясгалан "Судалгаанаас харахад Монгол Улсын хамгийн өндөр рейтингтэй улс төрч байдаг. Гэтэл хэдхэн өдрийн дараа та дараагийн ерөнхийлөгчид тамгаа шилжүүлнэ. Таны улс төрийн карьер үргэлжлэх.  Төгсөх үү?" гэж асуухад тэрбээр:

- Хэн ч мэдэхгүй! Амьдрал баян... гэж хариулжээ. 

Монгол Улсын Ерөнхийлөгчийн найм дахь удаагийн сонгууль болоход 2 хоног үлдлээ.