МОСКВА. /РИА Новости/. Улаан лоолийн давсгүй шүүс уух нь зүрх судасны өвчнөөр өвчлөх эрсдэлийг бууруулдаг гэсэн дүгнэлтийг Токиогийн Шүд судлалын их сургуулийн эрдэмтэд хийсэн байна. Энэ тухай MedicalXpress сэтгүүлд бичжээ.  


Эрдэмтдийн баг 184 эрэгтэй ба 297 эмэгтэй хүнийг оролцуулан туршилт явуулсан байна. 

Туршилтад оролцогчид бүтэн нэг жилийн хугацаанд улаан лоолийн шүүсийг тодорхой хязгаарлалтгүйгээр ууж байсан бөгөөд туршилтын эцэст оролцогчдын зүрх судасны тогтолцооны үйл ажиллагааны байдлыг тодорхойлжээ.

Хэмжилт хийж үзэхэд, холестериний түвшин өндөртэй 125 хүний хувьд холестериний хэмжээ багассан бол артерийн даралт өндөртэй 94 хүний цусны даралт буурсан байжээ. Ийм байдал янз бүрийн насны эрэгтэй, эмэгтэй хүмүүст ижилхэн ажиглагдсан байна. 


“Бидний бодлоор, энэхүү туршилт нь улаан лооль ба улаан лоолиор хийсэн бүтээгдэхүүнүүд нь зүрх судасны өвчнөөр өвчлөх эрсдэлд хэрхэн нөлөөлдгийг тогтоох зорилгоор бүтэн жилийн хугацаанд янз бүрийн насны хүмүүсийг хамруулан хийсэн анхны судалгааны ажил мөн” хэмээн Токиогийн Шүд судлалын их сургуулийн эрдэмтэд ярьжээ.    

Эх сурвалж: Монцамэ агентлаг