УИХ-ын найм дахь удаагийн сонгуулиар бүрдсэн шинэ парламент өнөөдөр Анхдугаар чуулганаа хуралдуулж байна.

Монгол Улсын Ерөнхийлөгч Х.Баттулга үг хэлж, Төрийн дууллыг эгшиглүүлснээр Анхдугаар чуулганыг нээв. УИХ-ын тухай хуулийн дэгт зааснаар насаар хамгийн ахмад гишүүн болох Х.Баделхан УИХ-ын даргыг томилогдох хүртэл чуулганы хуралдааныг даргалж байна. 76 мандатын эрх авсан гишүүн нэг бүрчлэн УИХ-ын гишүүний тангараг өргөх ёслол дөнгөж сая дуусаж, чуулган завсарлалаа. Улмаар тэдний УИХ-ын гишүүний бүрэн эрх хэрэгжиж эхэлж буй юм.

Анхдугаар чуулган 16.00 цагаас үргэлжилж, дараах асуудлуудыг хэлэлцэнэ.

- Улсын Их Хурлын дарга, дэд даргыг сонгох;

- Байнгын болон дэд хороодын бүрэлдэхүүнийг баталж Байнгын хорооны дарга нарыг сонгох;

- Ерөнхий сайдыг томилох;

- Засгийн газрын бүтэц, бүрэлдэхүүний тухай хууль хэлэлцэн батлах;

- Засгийн газрын гишүүдийг томилох.

- Улсын Их Хурлын чуулганы хуралдааны дэгийг шинэчлэн батлах эсэх асуудлыг шийдвэрлэх.

- Анхдугаар чуулганаар зохион байгуулалтын бусад асуудлыг хэлэлцэн шийдвэрлэж болно.

- Анхдугаар чуулганаар энэ хуулийн 14.3.7-д заасан асуудлаар санал хураалт явуулж, дэмжсэн бол Улсын Их Хурлын чуулганы хуралдааны дэгийг шинэчлэн батална.