Эрчим хүчний үнэ тарифыг хүчээр барьж олон жил явсны үр дүнд өнөөдөр тус салбар хүнд нөхцөлд байна. Байнга алдагдалтай байдаг салбар тоног төхөөрөмжөө шинэчилж чадахгүйд хүрсэн нь ажилчдыг эрсдэлд оруулаад байгаа ажээ. Түүнчлэн тэдний хөдөлмөрийн хөлсийг шударгаар үнэлэх шаардлага тулгарч байгаа юм. Цалин бага учраас олон жил ажилласан инженер, техникийн ажилчид салбараа орхиж, ажиллах хүчний дутагдалд оржээ.

Эрчим хүчний салбарын хүний нөөц, цалин хөлсний талаар Монголын эрчим хүч, геологи, уул уурхайн үйлдвэрчний эвлэлийн холбооны дарга Д.Долгортой ярилцлаа. Тэрбээр үүний тухайд:

Эрчим хүчний салбарын цахилгаан дулааны техникийн болон шугамны насжилт аль хэдийн хэтэрчихсэн. Үүнийг дахин ашиглаж болохгүй ч манай салбар хөрөнгө санхүүгүйгээс болоод технологийн шинэчлэлт хийж чадахгүй байдалд хүрээд байна. Мөн эрчим хүчний салбарын ажилчдын хөдөлмөр шударгаар үнэлэгдэхгүй байна. Тийм учраас эрчим хүчний салбарт ажиллаж буй 18 мянган ажилтны хөдөлмөрийг шударгаар үнэлж, аюулгүй ажиллах нөхцөлийг бүрдүүлэх хэрэгтэй байна хэмээн ярьлаа.