Ханжоугийн Азийн наадмын цахим спортын тэмцээнүүд үргэлжилж байна. Өчигдөр Монголын баг цахим спортын дота 2 төрөлд БНХАУ-ын багтай өрсөлдөж, мөнгөн медаль хүртлээ. 

Эхний ээлжийн тоглолтод Монголын баг илт илүүрхэж, оддын цуглуулга БНХАУ-ын багийг 40 минутанд буулган авсан ч хоёр дахь тоглолтод Хятадын баг учраа олж ялснаар тоглолтын харьцааг тэнцүүлэв. Улмаар гурав дахь ээлжийн тоглолтод Хятадын баг дахин ялалт байгуулан эх орондоо алтан медаль хүртлээ. 

Харин монголчууд анх удаагаа Азийн наадмын цахим спортын төрлөөс медаль хүртэж байгаа нь энэ юм.

Монгол Улсаа төлөөлөн оролцож буй “IHC Esports” баг хэсгийн шатандаа Узбекистаныг хожсон ч Мьянмарт ялагдаж, улмаар гурван баг оноо тоолон Монгол хэсгээ тэргүүлсэн. Тэд хасагдах шатанд эхлээд NAVI-ийн Malik, Malady тэргүүтэй Казахстаны хүчирхэг багийг 2:1 гэсэн харьцаатай хожиж, хагас шигшээд Киргизстаны багийг 2:0 гэсэн харьцаатай буулган авсан билээ. 

Share