Шинийн 1-ний өдөр Тээврийн цагдаагийн алба нийт 379 дуудлага хүлээн авснаас зам тээврийн ослын шинжтэй 307 дуудлага мэдээллийг хүлээн авч, шалгаж шийдвэрлэлээ. 

Нийт бүртгэгдсэн осол, хэргийн улмаас нийслэлд 7 хүн гэмтэж бэртсэний 2 нь бага насны хүүхэд бөгөөд зорчигч хэлбэрээр хөдөлгөөнд оролцож байх үедээ гэмтсэн байна. Түүнчлэн орон нутагт 2 хүний амь нас хохирсон ноцтой зам тээврийн ослууд бүртгэгдсэнийг харьяа аймгууд дахь Цагдаагийн газарт шалгаж байна. 

Бүртгэгдсэн зам тээврийн осол бүгд буюу 11 нь мөргөлдөх хэлбэрээр бүртгэгдсэн байгаагийн гол шалтгаан нь иргэд, жолооч нар тээврийн хэрэгслийн хурдыг хэтрүүлэх, эгнээ байр эзлэх болон уулзвар нэвтрэх журам зөрчсөнөөс шалтгаалан гарч байна. Мөн бага насны хүүхдүүд зорчигч хэлбэрээр осолд өртөж байгаа нь буруу тээвэрлэлт буюу хамгаалах хэрэгсэл хэрэглэхгүй тээвэрлэж байгаатай шууд холбоотой юм. 

Мөн Шинийн 1-ний өдрөөс эхлэн Улаанбаатар хотоос хөдөө орон, нутгийг чиглэх хөдөлгөөн эрчимжиж Баянзүрх, 22-ын товчоо, Налайхын замуудад ачаалал бий болохоос гадна Дархан, Сэлэнгэ, Төв аймгийн автозамууд тээврийн хэрэгслийн тоо ихтэй хөдөлгөөн үргэлжилж байна. 

Баяр, амралтын өдрүүдэд Архангай аймгийн Хашаат сумын Номгон багийн нутагт асфальтан замд H.Sonata маркийн автомашин онхолдож, 1 хүний амь нас хохирч, 3 хүн гэмтсэн мөн Дундговь аймгийн нутаг “Булангийн говь” гэх газар T.Crown маркийн автомашин N.Fuga маркийн автомашинтай мөргөлдөж 1 хүний амь нас хохирсон ноцтой зам тээврийн ослууд гарсан байх нь хурдыг тогтоосон хэмжээнээс хэтрүүлэх, гүйцэж түрүүлэх үйлдлийг буруу хийх зэргээс шалтгаалж байна. 

Иймд цагдаагийн байгууллагаас иргэдийг орон нутагт суугаа элгэн садандаа энх мэнд очиж золгохын тулд Замын хөдөлгөөний дүрмээ баримталж, анхаарал болгоомжтой хөдөлгөөнд оролцох, үзэгдэлт хангалтгүй, өөдөөс тээврийн хэрэгсэл ойртон ирж яваа болон эргэлт бүхий замд гүйцэж түрүүлэх үйлдлийг хийхгүй байх, тээврийн хэрэгслийн хурдыг тогтоосон хэмжээнээс хэтрүүлэлгүй зөв сонгон зорчихыг зөвлөж байна. 


Share