Гал түймрийн улмаас 6, 14 настай хүүхдүүд гэртээ амь насаа алджээ

Х.Оргил
03 сарын 15, 2020

Хөвсгөл аймгийн Рашаант сумын Тээл багийн “Хялганат” гэдэг газарт 8х8 метрийн хэмжээтэй иргэний байшин шатаж насанд хүрсэн 2 хүн, бага насны хүүхэд нас барсан талаар ОБЕГ мэдээллээ.

Галын дуудлагыг тус аймгийн албан хаагч нар 3 дугаар сарын 13-ны өдрийн 06:52 цагт хүлээн авч, орон нутгийн 20 иргэн, 4 автомашинтай 5 цаг 15 минут ажиллаж унтраасан байна.

Уг гал түймэрт тус сумын харьяат иргэн 42 настай Г,14 настай Б, 6 настай хүүхэд нар өртөж нас барсан тул цогцсыг Цагдаагийн байгууллагад шилжүүлэн өгсөн гэв.

Харин 17, 15 настай охид түлэгдэж, биеийн байдал хүнд байсан тул аймгийн Нэгдсэн эмнэлгийн “Эрчимт эмчилгээ”-ий тасагт тухайн өдрийн 20:10 цагт авчирч хэвтүүлэн хордлого тайлах, тогтворжуулах эмчилгээ хийжээ.

Гал түймэрт түлэгдсэн 2 хүүхдийг өчигдөр 07:30-17:20 цагийн хооронд ЗХ-ийн 303 дугаар ангийн МИ-171Е загварын нисдэг тэргээр ОБЕГ-ын 1 алба хаагч, ГССҮТ-ийн 2 ажилтан, экипажийн 4 алба хаагч, нийт 7 хүний бүрэлдэхүүнтэй ажлын хэсэг Улаанбаатар хот-Хөвсгөл аймгийн Мөрөн сум-Улаанбаатар хотын чиглэлд нислэг үйлдэн авчирч ГССҮТ-д шилжүүлэн өгсөн байна.