Нийслэлийн Засаг даргын захирамжаар “Улаанбаатар марафон-2022” олон улсын гүйлтийн тэмцээнийг тавдугаар сарын 28-ны бямба гарагт зохион байгуулахаар шийдвэрлэлээ. 

Нийслэлийн Биеийн тамир, спортын газрын Спорт, нийтийн биеийн тамирын хэлтсийн дарга А.Болдмаа, "High Payment Solutions" ХХК-ийн гүйцэтгэх захирал Б.Наранбат, Монголын хэт холын марафон гүйлтийн холбооны ерөнхий нарийн бичгийн дарга С.Өнөрбаяр нар дараах мэдээллийг өгсөн юм.

МАРАФОНЫ МАРШРУТАД ӨӨРЧЛӨЛТ ОРООГҮЙ

Нийслэлийн Биеийн тамир, спортын газрын Спорт, нийтийн биеийн тамирын хэлтсийн дарга А.Болдмаа:

-Уламжлал ёсоор тав, арван км, хагас, бүтэн марафон болон хөгжлийн бэрхшээлтэй иргэдийн гүйлт, гэр бүлийн гүйлтийг зохион байгуулна. 

Гүйлтэд оролцогчид Сүхбаатарын талбайгаас гараанаас гарч, Сүхбаатарын талбайд барианд орно. Маршрутад өөрчлөлт ороогүй, хуучин маршрутаар явна. 

Энэ жилийн бүртгэл, гүйлтийн зохион байгуулалтад техникийн шинэ дэвшлийг ашиглана. Төлбөрийг хялбарчилж, тамирчдын амжилтыг хэмжихэд ихээхэн дэвшил гарч байгаа. 

Гүйлтийг иргэдэд ээлтэй байдлаар зохион байгуулахаар Нийслэлийн Нийтийн тээврийн газар, Эрүүл мэндийн газар, Цагдаагийн удирдах газар, Боловсролын газар, дүүргүүдийн Засаг даргын Тамгын газрууд хамтран ажиллаж байгаа. 

Оролцогчид HiPay аппликейшн ашиглан бүртгүүлэхээс гадна нийслэлийн болон дүүргүүдийн биеийн тамир спортын хороо, Монголын хэт холын марафон гүйлтийн холбоо зэрэг газарт биеэр очиж, мэдээлэл авч, бүртгүүлж боломжтой гэлээ.

ОЛОН УЛСАД ХҮЛЭЭН ЗӨВШӨӨРСӨН ШИНЭЛЭГ ТЕХНОЛОГИЙГ НЭВТРҮҮЛНЭ

"High Payment Solutions" ХХК-ийн гүйцэтгэх захирал Б.Наранбат:

-Бид санаачилга гарган, НЗДТГ, Нийслэлийн Биеийн тамир, спортын газартай  хамтран хөгжүүлэлт хийж, http://www.ubmarathon.hipay.mn/ вэб сайт болон HiPay аппликейшнээр иргэд амар хялбараар бүртгүүлэх боломжийг бүрдүүлсэн. 

Гүйлтийн төрлөөс хамааран шалтгаалаад төлбөр нь өөр өөр байна. Төрлөө сонгоод дурын банкны картаар төлбөрөө төлж, бүртгүүлэх  боломжтой. 

“Улаанбаатар марафон” олон улсын марафон. Тиймээс олон улсын хэмжээнд зохион байгуулж, оролцогч тамирчдынхаа хурд, амжилтыг хэмждэг байх нь зохимжтой. 

Гүйлтэд оролцогчид хэдэн км цагийн хурдтай гүйж, хэддүгээр байр эзэлсэн бэ гэдгийг хэмждэг технологи байдаг. Тэрхүү технологийг Монгол Улсад анх удаа, нэвтрүүлж “Улаанбаатар марафон-2022”-д ашиглана. 

Оролцогч, гүйгчдэд уламжлал ёсоор дугаар, пайз тарааж өгнө. Тэрхүү дугаар дээр уншигч төхөөрөмж суулгах бөгөөд гүйлтийн замд хурдыг хэмжих юм. Бүртгэлийг автоматжуулснаар дараа, дараагийн жилүүдийн амжилтын түүх ч бүртгэгдээд явах юм.

Энэхүү марафонд эрүүл мэндийн гүйлт буюу 5 км-т нийт оролцогчдын 90 орчим хувь нь оролцдог онцлогтой. Тэдгээр хүмүүс нийгмийн оролцоогоо олонд мэдээлэх сонирхолтой байж болох юм. 

Тиймээс гүйлтэд оролцогчийн амжилтыг харуулсан гэрэл зураг, мэдээллийг харуулсан батламжийг дижитал байдлаар гаргаж өгөхөөр төлөвлөсөн. Бид богино хугацаанд технологийн шинэчлэл хийж, марафонд оролцогчдод амар хялбар байдлаар бүртгүүлэх, амжилтаа баталгаажуулах боломж олгож байна хэмээлээ.

МАРАФОНД ГАДААДЫН ТАМИРЧИД ОРОЛЦОНО

Монголын хэт холын марафон гүйлтийн холбоо жил бүр “Улаанбаатар марафон” олон улсын гүйлтийн тэмцээний зохион байгуулалтыг хариуцан ажилладаг. Тус холбооны гүйцэтгэх захирал С.Өнөрбаяр 

“Тэмцээний үеэр тамирчдад зориулсан усны дөрвөн цэгээс гадна эрсдэлээс хамгаалсан эмнэлгийн тусламж, үйлчилгээ ажиллана. Улаанбаатар марафон-2022” гүйлтийн тэмцээнд олон улсын тамирчид ч мөн оролцож байгаа. Одоогийн байдлаар Кени, Япон Улсын тамирчид оролцоно гэдгээ албан ёсоор мэдэгджээ.

Бүртгүүлж буй тамирчид эрүүл мэндийн байдалдаа хяналт тавих, зүрх судасны үйл ажиллагаагаа хянуулахыг зохион байгуулагчдын зүгээс анхаарууллаа. 

Иргэд цахимаар бүртгүүлж болохоос гадна харьяа дүүргийнхээ Биеийн тамир спортын хороо, Монголын хэт холын марафон гүйлтийн холбоо, www.marathon.ulaanbaatar.mn сайтад буй утасны дугаараар холбогдон хялбар, шуурхай бүртгүүлэх боломжтой юм. 

Мөн заавал PCR шинжилгээнд хамрагдсан байх гэх мэт хатуу шаардлага тавихгүй гэв.

Эх сурвалж: НИЙСЛЭЛИЙН СУРГАЛТ, СУДАЛГАА, ОЛОН НИЙТТЭЙ ХАРИЛЦАХ ГАЗАР

Share