Монгол Улсын 32 дахь Ерөнхий сайд Л.Оюун-Эрдэнэ өөрийн тэргүүлэх танхимын гишүүд буюу сайд нарыг өчигдөр томиллоо. Шинэ сайд нар тухайн өдөр Засгийн газрын гишүүний тангараг өргөж, сайдаар томилогдсон захирамжаа гардан үүрэгт ажлаа хүлээн авав. 

Нийт 16 сайд томилогдсоны 8 нь өмнөх буюу У.Хүрэлсүхийн тэргүүлсэн Засгийн газрын гишүүд бөгөөд 8 сайдыг шинээр томилсон. Тэднээс Боловсрол, шинжлэх ухааны сайдаар томилогдсон Л.Энх-Амгалангийн хөрөнгө, орлогын мэдүүлгийг хүргэж байна.

Тэрээр чуулганы нэгдсэн хуралдаанд гишүүдийн асуултад хариулах үеэрээ ""Дундаж давхаргын тогтолцоог бий болгох шинэчлэлтийг бид цаг алдалгүй хийх ёстой. Дундаж давхаргын тогтолцоо гэдгийг боловсрол, эрүүл мэндийн салбар, орон байрны санхүүжилтын тогтолцооны шинэчлэл гэж харж байгаа. Амин судас болох боловсролын салбар дээр надад итгэж, энэ салбарын шинэчлэлтийг хий гэж кабинетдаа урьж ажиллуулж байгаа гэж ойлгож байна. Монгол Улсад буй ядуурал, ажилгүйдэл, нийгмийн тэгш бус байдал, орлогын ялгааг би өнгөрсөн 30 жилийн боловсролын салбарын үр дүн гэж дүгнэж байна" хэмээсэн юм.


Түүний хөрөнгө, орлогын мэдүүлэг /2019 оны байдлаар/

Өөрийн орлого: 5 тэрбум 109 сая 859 мянган төгрөг /жилийн/

Гэр бүлийн нийт гишүүдийн орлого: 0

Орон сууц, барилга байгууламж: Нийт 1 тэрбум 586 сая төгрөгийн үнэ бүхий нийтийн орон сууц 2, үйлчилгээний зориулалттай барилга байгууламж 2

Тээврийн хэрэгсэл: Нийт 300 сая төгрөгийн үнэ бүхий жийп болон туулах чадвар өндөр, Lexus, 570- 1

Үнэт эдлэл, урлаг, түүхийн үнэт зүйл: 1 тэрбум 654 сая төгрөгөөр үнэлэгдэх үнэт эдлэлтэй

Хадгаламж, дансны үлдэгдэл: 

  • Дотоодын банк, санхүүгийн байгууллагад байрлах данс, хадгаламжинд 10 сая 160 мянган төгрөг
  • Гадаадын банк, санхүүгийн байгууллагад байрлах данс, хадгаламжинд 0

Авлага: 2 тэрбум 700 сая төгрөг

Анх авсан зээлийн хэмжээ: 244 сая төгрөг

Компани нөхөрлөл хоршоонд оруулсан хөрөнгө оруулалт: 


Сайд Л.Энх-Амгалангийн товч танилцуулга

Лувсанцэрэнгийн Энх-Амгалан нь 1970 онд Хөвсгөл аймгийн Мөрөн суманд төрсөн. 51 настай. Эхнэр, хүүхдүүдийн хамт амьдардаг. 

Боловсрол:

  • 1987 онд Хөвсгөл аймгийн Мөрөн сумын 2 дугаар арван жилийн сургууль, 
  • 1992 онд ОХУ-ын Санкт-Петербургийн их сургууль, 
  • 1996 онд АНУ-ын Дакотагийн их сургууль, 
  • 2002 онд БНСУ-ын Хангдоны их сургуулийг тус тус төгссөн. 

Мэдээллийн технологийн инженер-эдийн засагч мэргэжилтэй. 

Ажилласан байдал:

  • 1992-1995 онд Монцамэ агентлаг, Ил товчоо сонинд хариуцлагатай нарийн бичгийн дарга, 
  • 1995-1996 онд “Интерпресс” ХХК-ийн ерөнхий захирал, 
  • 1996-2012 онд “Эм Си Эс” группын Тэргүүн дэд ерөнхийлөгч, “Юнител” группын Захирлуудын зөвлөлийн дарга, 
  • 2011-2012 онд Монгол Улсын Ерөнхий сайдын Хөдөөгийн хөгжил, дэд бүгэц хариуцсан зөвлөх, 
  • 2012-2020 онд Улсын Их Хурлын гишүүн, 
  • 2016-2017 онд Улсын Их Хурлын Нийгмийн бодлого, боловсрол, соёл, шинжлэх ухааны байнгын хорооны дарга, 
  • 2017-2020 онд Улсын Их Хурлын Дэд даргаар тус тус ажилласан. 
  • 2020 оноос Улсын Их Хурлын гишүүн, Улсын Их Хурлын Төрийн байгуулалтын байнгын хорооны даргаар ажиллаж байна. 
  • Улсад 28 жил, үүнээс улс төрийн албан тушаалд 10 жил ажиллажээ.

Тэрээр УИХ-ын 2020 оны сонгуулиар Хөвсгөл аймагт нэр дэвшиж, УИХ-ын гишүүнээр сонгогдсон.