УИХ-ын дарга Г.Занданшатар Билгийн тооллын XVII жарны “Урвуулагч" хэмээх шороон гахай жилийн шинийн нэгэнд Төрийн золголт хийсний дараа ахмад буурлуудынд айлчлан золгож, хүндэтгэл үзүүллээ.

Жил бүрийн сар шинийн билэгт сайн өдөр монголчууд бид ахмад буурлууд дээрээ очиж мэндлэн хүндэлдэг уламжлалтай. Тус уламжлалын дагуу УИХ-ын даргын зочилсон буурлуудаас хамгийн өндөр настай нь Баянхонгор аймгийн Галуут сумын уугуул, өдгөө 102 насыг зооглож буй Д.Норов гуай аж. Тэрээр 1917 онд төрсөн, өдгөө үр хүүхэд, ач зээ нарынхаа хайр хүндлэл дунд ийнхүү шороон гахай жилтэйгээ золгоод байна.

УИХ-ын дарга Г.Занданшатар ахмад буурлууддаа хүндэтгэл үзүүлж, сар шинийн мэнд мэдэлцэж, гарын бэлэг гардуулаад учран золгож буй шинэ он эрүүл мэнд, өлзий хишиг дүүрэн байхын ерөөлийг  дэвшүүллээ гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.