Шинэ коронавиуртэй холбоотой асуудлаар Улсын онцгой комисс өнөөдөр хуралдаж, бүх их, дээд сургууль, ЕБС, цэцэрлэгт тавьсан хорио цээрийн дэглэмийг дөрөвдүгээр сарын 30-ныг хүртэл сунгалаа. Өөрөөр хэлбэл, дээрх хугацааг хүртэл сургууль, цэцэрлэг хичээллэхгүй.

Энэ талаар БСШУС-ын сайд Ё.Баатарбилэг "Эрүүл мэндийн яам, олон улсын байгууллагын мэдээллийг үндэслэж энэ шийдвэрийг гаргаж байна. Хорио цээрийн дэглэмийг сунгасан учраас манай яам дараах зохицуулалтуудыг хийнэ.

Хичээл, сургуулийг дөрөвдүгээр сарын 30-ны пүрэв гарагт эхлүүлнэ. Үргэлжлүүлэн бямба гараг бүрт хичээллэнэ.

ЕБС-ийн бага ангийг 2020 оны 6 дугаар сарын 6-ны бямба гарагийг дуустал, дунд, ахлах ангийг 6 дугаар сарын 13-ны бямба гараг дуустал хичээллүүлнэ.

Цэцэрлэгийн үйл ажиллагааг 2020 оны 5 дугаар сарын 31-ний өдрөөр дуусгавар болгоно.

Их, дээд сургуульд элсэгчдээс авах ЭЕШ-ыг УИХ-ын сонгуулийн дараа буюу 2020 оны 7 дугаар сарын 02-ны өдөр эхлүүлж, 05-нд дуусгана. Үүний дараа үргэлжилдэг их, дээд сургуулийн элсэлтийг 7 дугаар сарын 7-8-ны өдрүүдэд зохион байгуулна.

2020-2021 оны хичээлийн шинэ жилийг 2020 оны 8 дугаар сарын 15-нд эхлүүлнэ. 

ЕБС-ийн багш нарын ээлжийн амралт 6 дугаар сарын 15-ны даваа гарагт эхэлнэ. Багш нарын амралтын 48 хоногт ямар нэгэн өөрчлөлт орохгүй. Спорт, соёл урлагийн эхний хагас жилийн бүх нэгдсэн арга хэмжээ, тоглолтууд, олон улсын болн улсын аварга шалгаруулах тэмцээнүүдийг бүрэн зогсоосон. Одоо зөвхөн олимпод бэлтгэх зорилготой улсын шигшээ багийн дөрвөн төрлийн тамирчдын бэлтгэл сургуулилтыг онцгой горим, дэглэмтэй орчинд хангуулна.

Шинжлэх ухааны байгууллагууд нэгдсэн семинар, хуралдаан зохион байгуулахгүйгээр эрдэм шинжилгээ, судалгааны ажлуудаа үргэлжлүүлэн ажиллахаар болж байна" хэмээлээ.

Share