Хичээл, сургуулийн үй ажиллагаатай холбоотой Засгийн газрын тогтоол, БСШУС-ын сайдын тушаал гарчээ. Энэ талаар БСШУС-ийн сайд Ё.Баатарбилэг өнөөдөр мэдээлэл хийлээ.

Тэрээр "Шинэ коронавирусийн улмаас үүссэн хүнд нөхцөл байдалд салбарын үй ажиллагааг жигд явуулах тал дээр бид хичээж ажиллаж байна. Дэлхийн 192 оронд цэцэрлэг, сургуулийн үйл ажиллагааг бүрэн, цөөнгүй оронд хэсэгчлэн хаасан. Үүний улмаас 1.7 тэрбум хүүхэд, залуус сургалтад хамрагдаж чадахгүй байна. Энэ нь нийт суралцагчдын 91.3 хувь юм. 

Энэ сарын 15-нд манай улсын Засгийн газрын 119 дүгээр тогтоол гарсан. Тус тогтоолоор хичээл, сургуулийн үйл ажиллагааг 9 дүгээр сарын 01-н хүртэл хойшлуулсан. Үүнтэй холбоотойоор цэцэрлэг, ЕБС, МСҮТ, их, дээд сургууль, коллежийн суралцагчдад зориулсан теле болон онлайн хичээл, цахим сургалтуудыг 6 дугаар сарын 01-н хүртэл үргэлжлүүлнэ. 12 дугаар ангийн хүүхдүүдээс авдаг монгол хэл, бичгийн шалгалтыг энэ жил авахгүй. Мөн сургууль, цэцэрлэгийн байгууллагуудын халаалт, цахилгаан зэрэг хэмнэж болох зардлуудаа хэмнэх нь зүйтэй гэж шийдвэрлэсэн. 

Засгийн газрын тус тогтоолыг дагалдуулан салбарын сайдын тушаал гарсан. Үүнд:

1. Хичээлийн жилийг 6 дугаар сарын 01-нд дуусгана.

2. Хичээлийн жилийн үйл ажиллагаа дуусч буйтай холбогдуулан дараах арга хэмжээг авч хэрэгжүүлэхийг холбогдох нэгж, байгууллагуудад даалгасугай.

• Теле хичээлийн 6 дугаар сарын 01-н хүртэл зохион байгуулна.
• Цэцэрлэг, ЕБС-ийн багш, ажилчдын мэргэжил дээшлүүлэх сургалтыг  2020 оны 4, 5 дугаар сард цахим хэлбэрээр зохион байгуул. Үүнд 1, 5, 11 жил ажилладаг багш нар хамрагддаг бөгөөд өнөөдрийн байдлаар 4500 багш бүртгүүлсэн, 1800 нь онлайн сургалтад хамрагдаж байна.
• Теле болон цахим хичээлийг багшийн журналд тэмдэглэх заавар, 2020-2021 оны хичээлийн жилийн эхний сард өмнөх ангид судалсан байвал зохих агуулгыг бататгах арга зүйн зөвлөмж боловсруулж, цэцэрлэг, ЕБС-иудад хүргүүлнэ

3. Аймаг, нийслэлийн Соёл урлагийн газрын дарга нарт дараах зүйлсийг хэрэгжүүлэхийг үүрэг болгосон.

• Хичээлийн жилийг дуустал зохион байгуулж буй теле хичээл, цахим сургалт суралцагч бүр хүрч буй эсэхэд хяналт тавьж, хариу арга хэмжээ ав. Теле хичээл удаан үргэлжилж буйтай холбоотойгоор эцэс эхчүүдээс гомдол ирж байна. Хүүхдүүд теле хичээлдээ хамрагдахгүй байвал эцэст нь хохирно. Иймд эцэг эхчүүдийн чармайлт чухал, зөвхөн шүүмжлээд суугаад байж болохгүй.

Мөн 2020 онд цэцэрлэг, ЕБС-ийн сурагч, багш нарын дунд зохион байгуулах бүх олимпиад, тэмцээнийг цуцаллаа.

9, 12 дугаар анги төгсөгчдөд боловсролын гэрчилгээ олгодог. Энэ ажлыг 6 дугаар сарын 07-ны дотор холбогдох журмын дагуу зохион байгуулахыг даалгалаа.

Багш нарт мэргэжлийн зэрэг олгох асуудлыг ирэх 9 дүгээр сард зохицуулна.

Хоцрогдол арилгах, зайны сургалт зэрэг нэлээд олон сургалтыг зун зохион байгуулдаг. Бүгдийг нь зогсоож байна. 

ЕБС-ийн сурагчдын 100 хувь анги дэвшүүлэн суралцуулахыг бүх сургуулийн захиралд даалгасан. Сурагчдаас шалгалт авахгүй. Хоёрдугаар улирлын дүнг голлож, теле хичээлийг судаллсан байдалд нь багшийн өгсөн оноог нэгтгэж, дүн гаргана. Сурагчдын дүнг 6 дугаар сарын 06-ны дотор Боловсролын системд оруулсан байх ёстой. Гэхдээ хоёрдугаар улирлын дүнгээс доошлуулж болохгүй" хэмээлээ.

Мөн дотуур байранд амьдардаг сурагчдын эд зүйлс болон цэцэрлэгийн хүүхдүүдээс намар авсан хичээллээгүй хугацааны эд хэрэгслийг дөрөвдүгээр сард багтаан эцэг эхэд нь буцаан олгох чиглэл өгчээ.