COVID-19 /корона/ вирусийн эсрэг улс үндэстэн бүр урьдчилан сэргийлэх арга хэмжээ авч байгаа энэ үед хамгийн их эрсдэлтэй орны тоонд Монгол Улс багтсан. 

Тэр тусмаа нийт хүн амын 50 гаруй хувь нь оршин суудаг нийслэл Улаанбаатар гамшиг эрсдлийн өндөржүүлсэн бэлэн байдалд шилжээд байгаа. Ийм нөхцөлд  эрсдлийн бэлэн байдлыг шалгах ажлын хүрээнд Хотын захирагч С.Амарсайхан Багануур дүүргийн "Монхимо" ХХК-ийн эмийн үйлдвэрт ажиллалаа.

Энэ үйлдвэр нь Монголд төдийгүй гадаадад олон нэр төрлийн ариутгал халдваргүйжүүлэлтийн болон билогийн идэвхит эм, эмийн бүтээгдэхүүн худалдаалдаг. 

Гамшиг эрсдлийн өндөржүүлсэн бэлэн байдалтай байгаа энэ цагт тус үйлдвэрийн гол бүтээгдэхүүн болох гар ариутган халдваргүйжүүлэгч гель "Санитол"-ийг үйлдвэрлэхээр гурван ээлжээр 24 цагаар ажиллан бүтээгдэхүүнээ нэн шаардлагатай газруудад нийлүүлж буй аж. 

Тус үйлдвэрт үйлдвэрлэдэг гар халдваргүйжүүлэгч гель "Санитол" улсынхаа хэрэглээг бүрэн хангадаг байна.

Өдөрт  3-5 тонн үйлдвэрлэх хүчин чадалтай ч уг бүтээгдэхүүний түүхий эд болох хүнсний зориулалттай спиртийн нөөц хомсдож байгааг тус үйлдвэрийн захирал М.Ариунаа хотын даргад хэллээ. 

Хотын дарга энэ талаар "АПУ" ХК-ийн удирдлагуудтай тэр даруй утсаар ярьж үдээс хойш гэхэд "АПУ" ХК гурван тонн хүнсний спиртийг "Монхимо" эмийн үйлдвэрт нийлүүлэхээр болсон байна.

Эх сурвалж: Нийслэлийн ЗДТГ-ын Хэвлэл мэдээлэлтэй харилцах хэлтэс