Энэ сарын 24-нд Гэрэлт гудамжны замыг будаж тохижуулсан билээ. Гэвч өнгөрсөн шөнө орсон усархаг борооны улмаас замын шинэхэн будаг нь арилжээ. Энэ талаар иргэд "нийслэл их хэмжээний мөнгө зарцуулж, муу ажил хийлээ" хэмээн бухимдаад буй юм. Үүнтэй холбоотойгоор Гэрэлт гудамжны замыг будсан "Жоби" худалдааны төвийн Ерөнхий менежер Б.Чингис болон будах ажлыг гүйцэтгэсэн Улаанбаатар зам засвар арчлалтын газраас өнөөдөр мэдээлэл хийлээ.

Гэрэлт гудамжны замыг шатрын хөлөг шиг будах ажлыг "Жоби" худалдааны төвөөс санаачилжээ. Тэд хотын өнгө үзэмжид хувь нэмрээ оруулах зорилгоор нийслэлийн удирдлагуудаас гэрэлт гудамжийг будаж тохижуулах зөвшөөрөл авч, будалтын ажлыг мэргэжлийн байгууллага болох "Улаанбаатар зам засвар арчлалтын газар"-аар гүйцэтгүүлсэн байна.

Мөн замын хөдөлгөөнтэй холбоотойгоор Замын цагдаагийн албанаас зөвшөөрөл авсан аж. 

Замыг будсан тухайн будаг нь 4-5 хоногт бүрэн хатдаг. Харин будаг хатаж амжаагүй байхад өнгөрсөн шөнө усархаг бороо орсны улмаас будаг арилсан байна. Бид тухайн ажлыг гүйцэтгэхдээ нийслэлээс нэг ч төгрөг аваагүй болно. Бидний гол алдаа бол будаг хатах хугацаанд бороо ихээр орно гэдгийг тооцоолсонгүй. Тиймээс нийгмийн хариуцлагаа хүлээж будгийн ажлыг дахин чанатай хийж гүйцэтгэнэ гэдгээ  "Жоби" худалдааны төвийн Ерөнхий менежер Б.Чингис мэдээллийнхээ үеэр хэллээ.