Хүүхэд нь вирусийн гаралтай ханиадаар өвдсөн ч эмчийн бичсэн эмийг уулгалгүй, фэйсбүүк дэх зөвлөгөөг дагасан ээж 4 настай хүүхдээ цаг бусаар алдсан харамсалтай явдал АНУ-д гарчээ.

Тэрээр хүүхдэд элдэв эм өгөх биш өөрийнх нь дархлаагаар нь эдгээр ёстой гэсэн фэйсбүүк дэх зөвлөгөөг дагаж эмчийн бичсэн Тамифлю эмийг уулгаагүй ажээ. Үүнээс болж өндөр халуурсан хүү Колорадагийн эмнэлэгт хүргэгдсэн ч хэдийнэ оройтож амь насаа алдсан байна.

Дөрвөн настай хүүгийн ээж уг харамсалтай явдлын дараа эцэг эхчүүдэд захиа бичжээ. Тэрээр эмчийн зөвлөсөн эмийг уулгаагүйдээ, хэзээ ч шалгагдаж нотлогдоогүй мэдээлэлд итгэн хүүгээ алдсан тухайгаа өгүүлсэн байна. 

Эмч түүнд "Тамифлю" эмийг зөвлөжээ. Энэ нь 2009 он болон түүнээс хойших хугацаанд гарсан томуугийн А хүрээний H1N1 вирусын цар тахлын үед хэрэглэж буй аж.

Томуу, томуу төст өвчний үед "Тамифлю" эмийг зөвхөн эмнэлэгт, эмчийн зааврын дагуу хэрэглэх ёстой юм.

Фэйсбүүкэд энэ төрлийн худлаа мэдээлэл тараадаг групп цөөнгүй бий. Тухайлбал товлолт вакцинжуулалтыг эсэргүүцэгчдийн “Stop Mandatory Vaccination" хөдөлгөөн байдаг. Тэд өөрсдийн групптээ нас барсан хүүхдүүдийг вакцинаас болж амь насаа алдсан гэсэнбуруутгасан утгатай мэдээллийг түгээдэг аж.

Харин ДЭМБ-аас "Вакцинууд аюулгүй. Ихэнх тохиолдолд вакцин хийлгэсний дараа хэсэг газарт хөндүүрлэх эсвэл халуурах гэх мэт бага зэргийн зовиур хэсэг хугацаанд мэдрэгддэг. Ноцтой гаж нөлөө илрэх явдал нь маш цөөн тохиолддог ба тохиолдол бүрийг бүртгэж, шалгаж судалдаг. Нэг дор олон вакцин хийх нь хүүхдийн дархлааны системд ямар нэгэн сөрөг нөлөө үзүүлэхгүй  гэдэг нь судалгаагаар тогтоогдсон.  Хүүхдийн дархлааны систем  өдөр бүр хэдэн зуун гадны биеттэй тэмцэж ажиллаж байдаг" хэмээн зөвлөж байна.

Эх сурвалж: nbcnews.com/