ВАШИНГТОН. /BBC/. АНУ-ын “Google” компанийн “Android” үйлдлийн системтэй ухаалаг гар утаснуудаас аюулгүй байдлын доголдол илрүүлсэн тохиолдолд 200 мянгаас 1.5 сая ам.долларын шагнал өгөхөөр болжээ.

Хамгийн өндөр “шагнал”-ыг “Google”-ийн “Pixel” загварын утаснуудын “Titan M” чипээс доголдол илрүүлсэн тохиолдолд олгох аж. “Манай компани 2015 оноос хойш аюулгүй байдлын чиглэлийн судлаачдад 4 сая гаруй ам.долларыг олгосон” гэж “Google” компани мэдээлсэн байна. 

Гэсэн хэдий ч өндөр шагнал амласан эсэхийг үл харгалзан хүмүүс гэмт этгээдүүдээс мөнгө авахыг илүүд үзэж магадгүй хэмээн мэргэжилтнүүд таамаглажээ. “Google”-ээс гадна “Apple”, “Buzzfeed”, “Facebook”, “Samsung” зэрэг бусад компани мөн аюулгүй байдлын доголдлын талаар мэдээлсэн тохиолдолд шагнал санал болгодог юм. Ингэснээр энэ чиглэлийн мэдээллийг гэмт этгээдүүдийн гарт орохоос урьдчилан сэргийлнэ хэмээн тэд үздэг аж. 

Эх сурвалж: Монцамэ агентлаг