Засгийн газраас хэрэгжүүлж буй “Цахим Монгол” хөтөлбөрийн хүрээнд өнөөдрөөс халамжийн тэтгэврийн 4 төрлийг цахимжуулж, www.ehalamj.mn системд орууллаа.

Тодруулбал,

1. Нийгмийн халамжийн сангаас олгодог Ахмад настны тэтгэвэр, 
2. Хөгжлийн бэрхшээлтэй иргэнд олгох тэтгэвэр, 
3. Одой иргэнд олгох тэтгэвэр, 
4. Өрх толгойлсон эцэг, эхэд олгох халамжийн тэтгэврийг тус системээр дамжуулан олгох боломжтой боллоо. 

Өмнө нь буюу өнгөрсөн оны 8 дугаар сараас "Жирэмсэн эхийн тэтгэмж”, “0-3 хүртэлх насны хүүхэд асарсны тэтгэмж”, “Ихэр хүүхдийн тэтгэмж”, “Өрх толгойлсон эх, эцгийн тэтгэмж”, насны хишиг, Эхийн алдар 1 болон 2 дугаар одонтой эхэд олгох мөнгөн тусламж зэрэг нийт 6 төрлийн үйлчилгээг уг цахим системд бүртгэж эхэлсэн.

Ингэснээр нийт 10 төрлийн халамжийн үйлчилгээг цахим системээр дамжуулан олгох нөхцөл бүрдлээ.

Өнөөдөр нэмж буй 4 төрлийн тэтгэврийн үйлчилгээг энэ оны 3 дугаар сарын 15-ны өдрөөс эхлэн www.ehalamj.mn системээр дамжуулан олгоно.

www.ehalamj.mn нэгдсэн систем нь төрөөс иргэдэд үзүүлж буй нийгмийн халамжийн үйлчилгээг иргэдэд түргэн шуурхай чирэгдэлгүй хүргэх зорилготой.