Тогтвортой хөгжлийг дэмжигч
Өдгөө 62 настай Гусманыг хар тамхи хууль бусаар хил давуулсан, мөнгө угаасан гэх мэт нийт 10 хэргээр ялласан.
Гусман 2015 онд Мексикийн шоронд хоригдсон ч өөрийн хүмүүсээр газар доогуур нүх ухуулж оргосон. Харамсалтай нь удаагүй баригдаж 2017 онд Америкийн шорон руу шилжсэн билээ. Тэрбээр Америкийн хар тамхины хамгийн том нийлүүлэгч Синалоагийн картель (хар тамхи нийлүүлэгч мафи)-ийг толгойлдог байсан юм.
Энэ лхагва гарагт Бруклины шүүхийн шийдвэрийг сонсохоос өмнө Гусман хэлмэрчээр дамжуулан шударга бус ял эдлүүлж, тамлан зовоож байна гэж хэлүүллээ. Бүх насаар хорих ял Гусманы хүртсэн хамгийн бага хугацаа. Нэмэлт 30 жил нь зэвсэг хууль бусаар ашигласан хэргээр оноосон. Мөн 12.6 тэрбум доллар буюу 33.5 тэрбум төгрөг алдангид тооцож эд хөрөнгөөс нь хураахаар болжээ.
Прокуророос Гусманыг “олон тонн төмрийн цаана” ял эдэлнэ гэсэн нь Колорадо мужийн өндөр хамгаалалттай шоронг зүйрлүүлсэн аж. Гусманы хуульч Жеффри Лихтман “Шударга бус баривчилгаа, шийтгэлийг давж заалдана. Та нар түүнийг юу гэж бодох нь хамаагүй, тэр шударга ёсны шийтгэл хүртэх эрхтэй. Шоу хийхээ боль” хэмээсэн тухай BBC мэдээлэв.
Түүний эзэрхдэг Мексикийн хар тамхины дайн бидний төсөөлөх ч үгүй хэрцгийгээ өрнөдөг. Бүтэн гэр бүл, хар тамхины наймаанд орооцолдоогүй цагдаа гэж бараг үгүй. Өдөр бүр хүмүүсийн цогцос гудамжинд хэвтэж байдаг ба энэ бүхний ард хэдхэн эрхэм байдгаас хамгийн аймшигтай нь Эль Чапо байсан юм.
