Засгийн газар, УОК-ын шийдвэрээр хатуу хөл хориог маргаашаас бууруулж, гамшгаас хамгаалах "Шар" түвшинд шилжинэ. 

Энэ хүрээнд:

1. Уралдаан тэмцээн, 
2. Аялал зугаалга /гэр бүлээс бусад/, 
3. Өргөтгөсөн болон үзэсгэлэн худалдаа, 
4. Диско баар, 
5. Цахим тоглоомын газар, Хүүхдийн тоглоомын төвөөс бусад үйл ажиллагаа, үзвэр, үйлчилгээг тодорхой журмын дагуу нээнэ. Ингэснээр нийт ААН-ийн 95 хувь нь үйл ажиллагаагаа нээж, эдийн засгийн эргэлтэд орно гэдгийг УОК-оос мэдээлсэн.

Энэ үед ААН-үүд хэрхэн ажиллах түр журмыг танилцуулж, Засгийн газрын Хэвлэл мэдээллийн албаны дарга Ц.Ганзориг өнөөдөр мэдээлэл хийлээ.

Тэрээр "Бүх байгууллагад хүн хооронд 2 метрийн зай барина. Амны хаалт тогтмол зүүж, хоёр цаг тутамд солино. Гар ариутгагчийг үүдэндээ байршуулах шаардлагатай"-г онцоллоо.

Түр журмын онцлох заалтуудаас хүргэж байна.

Худалдааны төв, их дэлгүүр, зах зэрэг томоохон худалдааны газрууд:

• Нэвтрүүлэх хэсэгтээ халдваргүйжүүлэх автомат төхөөрөмжийг суурилуулж, халуун хэмжигч байрлуулж, ариутгах бүхээгтэй болох ёстой.
• QR код байрлуулж, үйлчлүүлэгчдээр уншуулна.
• Касс, лангуун дээр иргэдийг бөөгнөрүүлэх байх, хамгаалах шилэн хаалт хийх
• Бэлэн хүнсний бүтээгдэхүүнийг уутанд хийх, битүү хоргонд худалдаалах
• Ажилчдын солих хамгаалал хэрэгслийн нөөцтэй байх

Хоол үйлдвэрлэл, үйлчилгээний салбар:

• Үүнд ресторан, сүлжээ хоолны газар, цайны газар, кафе, караоке, кофе шопууд орно.
• Үйлчилгээний танхимын ширээ хооронд 2 метрийн зайтай байна. Аль болох хуванцар хаалт суурилуулах,
• Аяга , таваг хэрэгслээ заавал гурван дамжлагат угаалгаар тогтмол угаах,
• Аль болох бэлэн мөнгөнөөс татгалзаж, үйлчлүүлэгчийн төлбөрийг карт болон цахим байдлаар төлүүлэхийг хэвшил болгох,
• VIP болон караоке зэрэг нь нэг өрөөнд 50 хувиас хэтрэхгүй хүн оруулна. Тухайлбал, 10 хүний өрөөнд 5-аас олон хүн оруулахгүй. Хамгийн гол нь үйлчлүүлэгч бүрийн микрофонд хэрэглэх бүрхэвчийг тогтмол солино.
• Өрөөг  хоёр цаг тутамд цэвэрлэж, халдваргүйжүүлнэ.

Үсчин, гоо сайхан, хумс заслийн үйл ажиллагаа:

• Хүн хоорондын зайг хоёр метрээс багагүй байлгана.
• Ажиллагсад нь амны хаалт, нэг удаагийн бээлий, нүүрний хаалт, нийлэг хальсан хормогч, даавуун болон цаасан тохойвч хэрэглэх, эдгээрийг солих нөөцийг бүрдүүлэх
• Үйлчлүүлэгчдийг аль болох бөөгнөрүүлэхгүй, цагийн хуваарийн дагуу авах,
• Гоо сайхны нэг өрөөнд зөвхөн нэг хүнд үйлчилнэ

Нийтийн халуун ус, саун, бассейн:

• Хүний бөөгнөрөл үүсгэхгүйгээр урьдчилсан захиалга авч хэвших
• Халуун усны шүршүүр, массажны өрөөнд зөвхөн нэг хүнд үйлчилнэ.
• Бассейны усыг зааврын дагуу халдваргүйжүүлж, үлдэгдэл хлорын хэмжээнд өдөр бүр  дотоодын хяналт тавьж, улирал тутам мэргэжлийн байгууллагаар шинжилгээ хийлгэж, дүгнэлт гаргуулна.

Амралтын газрууд:

• Хүний бөөгнөрөл үүсгэхгүй байх үүднээс тухайн амралтын газрын өрөө, орны хүрэлцээнээс хэтрэхгүй үйлчлүүлэгчдийн захиалгыг авах ёстой.
• Үйлчлүүлэгчдийн өглөө, өдөр, оройн хоолыг нэг цагт зохион байгуулахгүй байх, хоолны үйлчилгээг аль болох өрөөнд үзүүлэх
• Нүхэн жорлон болон бохир усны цооногт сар бүр халдваргүйжүүлэлт хийнэ.
• Олон нийтийг хамарсан арга хэмжээ зохион байгуулахгүй байх,

Биеийн тамир, спорт, бялдаржуулах, чийрэгжүүлэх төвүүд:

• Сургалтын байр, тоног төхөөрөмж, хэрэгсэл, зориулалтын хувцсыг тухай бүрт нь цэвэрлэж, халдваргүйжүүлнэ.
• Агаар сэлгэлтийг хоёр цаг тутамд тогтмол хийнэ.

Соёл урлаг, музей, үзвэр, үйлчилгээ, олон нийтийн арга хэмжээ, хурал цуглааны үед мөн тодорхой журмыг баримтална. Тухайлбал,

• Хамт явж байгаа биш бол үзвэрийн танхимд нэг суудал алгасуулж суулгана.
• Танхим 50 хувийн дүүргэлттэй байна.
• Тасалбарыг цахим хэлбэрээр авах нөхцөлийг бүрдүүлнэ
• Тасалбар авах хэсэгт бөөгнөрөл, дугаарлалт үүсгэхгүй.
• Кино театр дахь үзвэрийн зориулалттай нүдний шилийг заавал халдваргүйжүүлснээр дараагийн үйлчлүүлэгчид өгнө.
• Шашны байгууллага хурал ном зохион байгуулахдаа бүгд хоёр метрийн зай барина, буяны төлбөрийг бэлэн мөнгөөр хийхгүй.

Бүх сургалтын төвүүд:

• Хүн хооронд болон ширээний зайг 2 метрээс багагүй байлгана.
• Үйлдвэрлэлийн дадлагын тоног төхөөрөмж, багаж хэрэгсэл, хэрэглэгдэхүүн, сургалтын гарын авлага, үзэг бал зэрэг эд зүйлсийг суралцагч хоорондоо дамжуулахгүй байх, шаардлагатай тохиолдолд халдваргүйжүүлж дамжуулах,