Шинэ коронавируст халдварын Монгол дахь нөхцөл байдлын талаар ХӨСҮТ-ийн Ерөнхий захирал Д.Нямхүү өнөөдөр мэдээлэл өглөө.

Тэрээр "2020 оны 11 дүгээр сарын 04, 05-нд нийт 1068 хүний сорьцод шинжилгэ хийсэн. Тэдний дөрвөөс нь коронавирус илэрлээ. Бусдаас нь илрээгүй. 

Коронавирус илэрсэн 4 хүний хоёр нь Алтанбулаг боомтоор орж ирсэн ачаа тээврийн жолооч, 30 болон 48 настай эрэгтэй, Беларус улсын иргэд байна. 10 дугаар сарын 20-нд Энэтхэг-Улаанбаатар чиглэлийн тусгай үүргийн онгоцоор ирсэн нэг хүний давтан шинжилгээнд коронавирус илэрлээ. Энэ нь 19 настай эрэгтэй. 

Мөн коронавирусийн халдвартай өвчтөнүүдэд үйлчилж байсан багийн нэг сувилагчийн хяналтын шинжилгээнээс коронавирус илэрлээ. Тэд багаараа 14 хоногоор өвтөнүүд рүү орж тусгаарлагдан ажилладаг. Тэд 14 хоног тусгаарлагдан ажиллаж гараад, ажлын байранд дахин 14 хоног тусгаарлагдаад нийт 28 хоногийн дараа гэртээ очдог. Коронавирус илэрсэн сувилагч коронавирустэй хүмүүс рүү орж 14 хоног ажиллаж дуусаад, 14 хоногийн тусгаарлалтынх нь 12 дахь хоног дээр коронавирус илэрсэн. Ажлын баг хамт олныг хяналтдаа аваад шинжилгээ, хяналтыг үргэлжлүүлэн хийж байна.

Улмаар Монгол Улсад коронавирусийн нийт 356 тохиолдол бүртгэгдлээ. Тэдний 314 нь эдгэрснээс 310 хүний бүх ажиглалт, тандалтын хугацаа дууссан. Гэрийн ажиглалтад 3, сувиллын ажиглалтад нэг хүн байна. ХӨСҮТ-д нийт 42 хүн эмчлүүлж байна" хэмээлээ.

Share