УИХ-ын 2021 оны хаврын чуулганыг өнөөдөр нээлээ. Өнгөрсөн онд хийгдсэн Үндсэн хуулийн нэмэлт өөрчлөлтөөр УИХ-ын чуулганы үргэлжлэх хугацааг сунгаж, ажлын 75 хоног болгосон. Иймд 04 дүгээр сарын 05-нд эхэлдэг байсан УИХ-ын хаврын чуулган 03 дугаар сарын 15-нд буюу 20 хоногийн өмнө эхэлж байна. 

Хаврын чуулган эхэлсэнтэй холбоотойгоор УИХ дахь МАН-ын бүлэг өнөөдөр мэдээлэл хийлээ.

Мэдээллийн үеэр тус бүлгийн дарга Д.Тогтохсүрэн "Энэ хаврын чуулганаар дараах бид 4 асуудалд онцгой анхаарна.

1. Үндсэн хуулийн нэмэлт өөрчлөлтийн дагуу эрхзүйн шинэчлэлийн ажлуудыг хэрэгжүүлж эхлэх зайлшгүй шаардлага байгаа. Үүнд өмчийн асуудал буюу төрийн болон орон нутгийн өмчийн тухай хуулиуд, Үндэсний баялгийн сангийн тухай хууль, төрийн өмчит компаниудын тухай зэрэг хуулиудыг хэлэлцэн батална. Мөн Улс төрийн намын тухай, Ерөнхийлөгчийн тухай хууль, орон нутгийн хөгжлийг хангах, хот тосгоны эрхзүйн байдлын тухай хууль, нийслэлийн эрхзүйн байдлын тухай хуулиудыг батална.

2. Хүний эрхийг хангах, нийгэмд шударга ёсыг тогтоох, шүүх, хуулийн байгууллагуудын хараат бус байдлыг хангахад чиглэгдсэн эрхзүйн орчныг сайжруулах асуудал байна. Энэ чиглэлээрх тодорхой хуулиудыг хэлэлцэн батална.

3. УИХ-ын хяналт шалгалтын чиг үүргийн нэмэгдүүлэх чиглэлд анхаарна. Үндсэн хуулийн нэмэлт, өөрчлөлтөөр УИХ-д томилгоо хийдэг төсвийн тодорхой эрх мэдлүүд хязгаарлагдсан ч хяналтын чиг үүрэг нь нэмэгдсэн. Тиймээс хяналтын чиг үүргийг нэмэгдүүлэх эрх зүйн орчныг тодорхой болгоно.

4. Оюутолгойн гэрээний хэрэгжилтийг хангах УИХ-аас өнгөрсөн онд гаргасан 92 дугаар тогтоолын хэрэгжилтийг хангах чиглэлд анхаарна.

Ийм 4 чиглэлд энэ хаврын чуулганы гол эрх зүйн шинэчлэлийн ажлууд хийгдэнэ" хэмээлээ.

Мөн тэрээр "Монгол Улсаас АНУ-д суугаа Элчин сайд Ё.Отгонбаярыг эгүүлэн татах асуудлыг зөвшилцөхөөр Ерөнхийлөгчөөс ирүүлсэн албан бичгийг УИХ-ын Аюулгүй байдал, гадаад бодлогын байнгын хорооны хуралдаанаар хэлэлцсэн. Долоо хоногийн дотор Байнгын хороогоор хэлэлцэх дэгийн дагуу өнгөрсөн баасан гарагт хэлэлцсэн. Тус хуралдаанаар Ё.Отгонбаярыг эгүүлэн татах нөхцөл үүсээгүй байна гэж үзсэн. Байнгын хороо уг саналаа ирэх пүрэв гарагт УИХ-ын чуулганы нэгдсэн хуралдаанд оруулж, мөн Ерөнхийлөгчид санал хүргүүлэх ёстой" гэв.

УИХ-ын тухай хуульд зааснаар анхдугаар хуралдааны дараа тангараг өргөөгүй УИХ-ын гишүүн оролцсон хуралдааныхаа дараа тангараг өргөдөг. Тиймээс Ж.Эрдэнэбат ирэх пүрэв гарагийн нэгдсэн хуралдааны үеэр УИХ-ын гишүүний тангараг өргөнө гэдгийг мөн хэллээ.