Эдита Морделийн хүү төрснийхөө дараа Дауны хам шинж өвчнөөр оношлогдсон. Ээж нь энэ явдалд National Health Service улсын байгууллагыг буруутган шүүхэд зарга мэдүүлжээ Тодруулбал, Дауны синдромыг ураг эхийн хэвлийд байх үед илрүүлэх боломжтой ба холбогдох шинжилгээг хийж эрт илрүүлээгүйд Эдита гомдолтой байгаа билээ. 

Өдгөө дөрвөн настай Александр хүүдээ ээж нь хайртай ч Лондоны Дээд шүүхэд өгсөн мэдүүлэгтээ хүүгийн эрүүл мэндийн байдлыг мэдсэн бол жирэмслэлтийг зогсоох байсан гэсэн аж. 

NHS байгууллага онцгой төрсөн хүүхдийг хэвлийд байхад нь оношилж чадаагүй гэх асуудлаар таван жилийн дотор 16 гэр бүлд 40 сая еврогийн нөхөн төлбөр төлсөн. Нэг гэр бүлд 2.5 сая евро гэсэн үг. Харин хатагтай Морделийн хувьд хүү нь бусдаас илүү анхаарал халамж шаарддаг, ажил хийх цаг нь богиноссон тул амьжиргааны зардал болгож 200 мянган евро нэхэмжилсэн гэнэ. 

Мордел 2014 онд жирэмсэн гэдгээ мэдсэн ба эх баригч эмчтэйгээ уулзсан эхний өдрөө л Дауны синдромтой, эсэхийг нь тогтоолгох хүсэлтэй буйгаа хэлжээ. Ийнхүү 12 дахь долоо хоногийн ЭХО шинжилгээнд очихдоо бүх зүйл хэвийн, ном журмын дагуу болсон гэж бодсон. Гэтэл үнэндээ ЭХО үзлэг хийж өгөөгүй, худал хэлээд Дауны хам шинж ажиглагдаагүй гэсэн бичиг өгөөд явуулжээ. 

Харин NFS-ийн талаас шинжилгээ хийх гэсэн ч эсэргүүцсэн гэж мэдэгдсэн юм. Ийнхүү хүүг 9 сар тээж  2015 оны Нэгдүгээр сард кесарийн хагалгаагаар төрүүлсний дараа бүх зүйл тодорхой болсон аж. Хүүгийн аав, ээж 2 энэ талаар эрт мэдсэн бол энэ хорвоод төрүүлэхгүй байсанд санал нэгдсэн байна. 

Дауны синдром тогтоох шинжилгээнээс үүдэж 50 ураг тутмын нэг нь зулбадаг тул хатагтай Мордел бодлоо өөрчилсөн гэж эсрэг талаас дүгнэсэн. Харин Мордел энэ талаар маш олон сар уншиж судалсан, сэтгэлийн бэлтгэлтэй байсан, бодлоо өөрчлөөгүй гэсэн юм. 

Share