Хүнс, хөдөө аж ахуй, хөнгөн үйлдвэр /ХХААХҮ/-ийн сайд Ч.Улааныг огцруулах хуулийн төслийг УИХ-ын даргад өргөн барьсан талаараа УИХ-ын гишүүн Б.Пүрэвдорж өнөөдөр мэдээлэл хийлээ.

Тэрээр "Би Ч.Улаан сайдыг гурван үндэслэлээр огцруулах хуулийн төслийг УИХ-ын дарга Г.Занданшатар өргөн барьсан. Тодруулбал,

  1. Малын үнийг унагааж, малчдын орлогыг багасгасан
  2. Монголын махны үйлдвэрүүдийн үйл ажиллагааг доголдуулж, дампуурах хэмжээнд хүргэсэн.
  3. БНХАУ-ын махны үйлдвэрүүдийг дэмжсэн.

Өнгөрсөн 9 дүгээр сард малын үнэ хангалттай хэмжээнд өссөн байсан. Тухайлбал, нэг төлөг 100.000, эм хонь 130.000, эр хонь 160.000 төгрөгт хүрсэн. Тэгвэл өнөөдрийн байдлаар тус бүрийн үнэ 20-30 мянган төгрөгөөр унасан. Эдгээр уналт нь Ч.Улаан сайдын гаргасан "компаниудад квот олгох" шийдвэрийн үр дүн юм.

Монгол Улс махны 140 гаруй үйлдвэртэй. Гэвч 12 компанид БНХАУ руу мах экспортлох квот олгосон. Квот нь цөөн учир эрэлт бий болгож, авлигаар өгдөг. Үлдсэн 130 гаруй компани нь адууны махны нэг кг тус бүрийн үнэ дээр 12 юанийн төлбөр төлж, нөгөө 12 компаниас квот авдаг болсон байна. Тиймээс махны компаниуд малчдын малын махны үнийг унагаах замаар авлигын мөнгөө гарган авч байна. 

Квот олгосон 12 компанийн 9 нь БНХАУ-ынх, 3 нь сайд дарга нарынх байна. Тэдгээр дотор Ерөнхий сайд У.Хүрэлсүхийн төрсөн дүүгийн компанид 500 тонн махны зөвшөөрөл олгосон. Ийм луйврын системийг ХХААХҮ-ийн үе үеийн сайд хэзээ ч хийж байгаагүй. Хулгайн энэ системийг Ч.Улааны үед л хийж эхэллээ. Тиймээс 250 гаруй мянган малчны өмнөөс Ч.Улааныг огцруулах хуулийн төслийг өргөн барьсан" хэмээлээ.