Өнөөдрийн байдлаар шинэ коронавирусийн халдвар дэлхийн 213 улс, бүс нутагт бүртгэгдэж, нийт 2.920.877 хүн өвчилжээ. Тэдгээрээс 836.664 нь эдгэрч, 203.272 хүн нас барж, бусад нь эмнэлэгт хэвтэн эмчлүүлж байна.

Манай улсын хувьд коронавирусийн нийт 38 батлагдсан тохиолдол бүртгэгдсэнээс 9 нь эдгэрч, 29 нь ХӨСҮТ-д хэвтэн эмчлүүлж байна. Бүртгэгдсэн тохиолдлууд бүгд зөөвөрлөгдөж орж ирсэн, тусгаарлалтар байх үедээ илэрсэн. Өөрөөр хэлбэл, улс дотроо коронавирусийн халдварыг алдаагүй байна.

38 дахь тохиолдлын өнөөдөр илэрсэн бөгөөд ОХУ-аас ирсэн, эрсдэлтэйд тооцож ХӨСҮТ-д тусгаарласан 32 оюутны нэг юм. Өнөөдрийн байдлаар тэдгээр оюутны 21-ээс нь коронавирус илрээд байна.

Үүнтэй холбоотой асуудлаар Эрүүл мэндийн сайд Д.Сарангэрэл өнөөдөр өөрийн цахим хуудаснаа байр сууриа илэрхийлжээ.

Тэрээр "Сүүлийн хэдэн өдөр фэйсбүүкийг хаах гэж байна, тэгвэл тэмцэнэ гэсэн байр суурь сошиалд зарим хүн илэрхийлж байна. Албан ёсны шийдвэр хаана ч гараагүй. Гарах ч үгүй байх. Фэйсбүүк бол хүн хоорондын харилцааны хэрэгсэл, байр сууриа илэрхийлэх индэр, мэдээлэл авах боломж. Харин худал ташаа мэдээлэл түгээх, хэн нэгнийг гүтгэн доромжлох, нийгмийг хагалган бутаргах хэрэгсэл байж хэрхэвч болохгүй. Үүнд хууль, хүчний байгууллага хяналт тавих шаардлагатай. 

Энэ тухай бичих болсон маань учиртай. ОХУ-д сурдаг оюутнууд маань орох орон, оочих аягагүй болоод онгоц, галт тэрэг, машин гээд таарсан унаандаа суугаад 80-уулаа эх орноо тэмцээд ирсэн. Тэдний маань 32 нь асуумж болон үзлэгээр сэжигтэйд тооцогдсон учраас ХӨСҮТ-д тусгаарлагдсан. Манай мэргэжлийн хүмүүс аргагүй л туршлага чадвартай нь харагдаж байна. 

Өнөөдрийн байдлаар 32 хүүхдээс 21 нь өвджээ. Хувь хүний онцлог, дархлаа зэргээс хамаарч халдвар авсан нь хугацааны хувьд ялгаатай оношлогдож байна. Үүнийг "Өдөр бүр корона нэгээр нэмэгдэж байна. Яах гэж авчирсан юм. Аюул бий болгож байна" гэж загнаж шүүмжилж байна. 

Харин энэ хүүхдүүд маань эх орондоо ирж, оношлогдож, хяналтад байгаа нь ямар сайн хэрэг вэ. Хүний нутагт очих газаргүй, хоол ундгүй, халдвар авсанаа ч мэдэхгүй явж байгаад цаг алдсан бол жинхэнэ аюул энэ л байхсан бус уу. 

Харин та бид хүн амынхаа дунд халдварын тархалт гаргахгүй байхын төлөө хамтын хүчээр хичээн зүтгэх нь хамгийн чухал. Үүний төлөө юу хийхийг Та бүхэн мэднэ. Зарим нэг орны иргэд ирэх 7 хоногоос багахан хугацаагаар гэрээсээ гарч салхилах эсэхээ шийдэх тухай ярьж байна. Тиймээс одоо байгаа боломжоо алдахгүйн төлөө хичээцгээе. Хаврын сайхан өдрийг цоглог өнгөрөөж дархлаагаа дэмжээрэй" хэмээн бичжээ.