Ирэх сарын нэгнээс эхлэн 1072 хувьцааны ногдол ашгийг олгож эхэлнэ. Үнэт цаасны дансаа нээгээгүй иргэдийн хувьд и баримт апп-д холбосон дансаараа ногдол ашгаа хүлээн авах боломжтой аж. Энэ талаар "1072 хувьцаа мэдээллийн төв"-ийн менежер Э.Баатарцогт тодруулга өглөө.

Э.Баатарцог:

Иргэний бүртгэлийн шинэчилсэн мэдээгээр “Эрдэнэс-Тавантолгой” ХК-ийн хувьцаа эзэмшигч иргэний тоо 2.512.000 болсон бөгөөд үүнээс 2.036.000 иргэн хувьцааны данс нээлгэжээ.

Хувьцааны данс гэдэг нь зөвхөн 1072 хувьцааны ногдол ашиг авах төдийгөөр хязгаарлагдахгүй, хөрөнгийн зах зээлд арилжаа эрхлэх боломж гэж харах хэрэгтэй. Монголчууд маань 1992 оноос хойш санхүүгийн зах зээлээс банктай л хамгийн ойр харилцаж ирсэн харин хөрөнгийн зах зээлийн талаар ойлголт тун тааруу. Тийм учраас хувьцааны данс нээхийн ач холбогдлыг төдийлөн ойлгохгүй байна. Тухайн иргэн брокер дилерийн компанид дансаа нээлгэснээр МХБ дэх 200 гаруй компанийн худалдан авч, арилжаа хийж ашиг олох боломжтой гэдгийг дурдах ёстой. 

Бид өмнө нь 1072 хувьцааны данс нээхийн тулд заавал брокер дилерийн компанид дансаа нээлгэхийг шаардаж байсан. Одоо бол Засгийн газраас өндөржүүлсэн бэлэн байдлын зэрэгт шилжүүлсэн хугацааг сунгасантай холбоотойгоор заавал дансаа нээлгэхгүй байх боломжийг бүрдүүллээ. Энэхүү шийдэл нь и баримт апп юм. Ингэснээр хувьцааны дансгүй иргэд ногдол ашгаа ямар нэгэн хүндрэл чирэгдэлгүйгээр авах юм.

И баримтад 1,3 сая гаруй иргэдийн банкны данс баталгаатай бий, иргэд энэхүү дансаараа НӨАТ-ын буцаан олголтоо авдаг. Энэхүү дансаараа иргэд 1072 хувьцааны ногдол ашгаа авах учраас бүртгүүлээд баталгаажуулах ёстой.Ийнхүү мэдээллээ баталгаажуулсан иргэдэд хувьцааны ногдол ашиг хамгийн түрүүнд буюу 5 дугаар сарын 1-нд олгогдоно. Манай иргэдийн дийлэнх нь и баримт системийг ашиглаад сурчихсан учраас хүндрэл бэрхшээл үүсэхгүй.

Орохдоо  Хувь хүний орлогын албан татварын тухай хуулийн 9.1, 9.3, 21.2.4; Аж ахуйн нэгжийн орлогын албан татварын тухай хуулийн 9.1, 9.3-т заасны дагуу 10 хувийн татвар суутгуулах юм. Тэрхүү бичилт нь татварын цэнхэр дэвтэрт бичигдэнэ. Энэ нь Дэлхийн хэмжээнд “COVID-19” халдвар дэгдсэнтэй холбоотойгоор иргэдийг бөөгнөрүүлж, чирэгдэл учруулахгүй байх зорилготой гэдгийг хэлэх ёстой.

Эхлээд Үнэт Цаасны Төвлөрсөн Хадгаламжийн Төвд данстай иргэд 1072 хувьцааны ногдол ашгаа авна. Дараа нь и баримт апп-тай иргэд рүү хүсэлт явуулж өөрийн дансаараа ногдол ашиг авах эсэхийг тодруулна. Иргэн зөвшөөрсөн цэс дээр дарснаар ногдол ашгаа авах бүрэн боломжтой. Ингэснээр 1,7 орчим иргэдийн ногдол ашгаа үе шаттайгаар 5 дугаар сарын 14-ний хооронд авна.

Хүүхдийн ногдол ашгийг хэрхэн авах гэж гэж эцэг эхчүүд асууж байна. Хүүхдийн мөнгө авдаг данс руу нь автоматаар орно. 

2012 оны 4 дүгээр сарын 11-ээс өмнө төрсөн иргэд  “Эрдэнэс-Тавантолгой” ХК-ийн хувьцаа эзэмшигч болох учраас ногдол ашиг хүртэх эрх үүснэ. Түүнээс хойш төрсөн иргэд уг хувьцааг эзэмших боломж одоохондоо байхгүй. 

Монгол Улсын иргэдэд эзэмшүүлсэн “Эрдэнэс Тавантолгой” ХК дахь өөрийн эзэмшлийн хувьцаагаа худалдах хүсэлт гаргасан иргэний эзэмшиж байгаа 1072 хувьцааны 30 хувьтай тэнцэх буюу 323 ширхэг хувьцааг нэрлэсэн үнээр нь иргэдээс худалдаж авах шийдвэрийг Засгийн газар гаргаж байсан. Хэрвээ энэ үед 300 мянган төгрөг авч байсан бол 750 ширхэг хувьцаатай гэсэн үг.  Энэ мэтээр иргэдийн хувьцааны тоо ширхэг өөр өөр байгаа. Иймээс өөрийн хувьцааныхаа тоо ширхэгээр ногдол ашгаа авах юм.

Гэхдээ иргэдэд хувьцааны дансаа онлайнаар нээх боломж бий. Онлайнаар дансаа нээчихэж болно.

Иргэдийн мэдээлэл дутуугаас залилуулах тохиолдол гарч байна. Интернэтээр тухайн хүний хувьцааг аваагүй мөртлөө хувийн мэдээлэл болох гэрийн хаяг, утасны дугаар, регистрийг нь аваад нэмж 5000 төгрөгийн дансаар шилжүүлсэн авах болсон. Энэхүү авсан мэдээллээ ашиглан facebook-ээ хакердуулах, булаалгах зэрэг залилан хийж байгааг иргэд анхаарууштай. Иргэдэд хандаж хэлэхэд ийм хуурамч зүйлд бүү итгээрэй гэж сануулан хэлмээр байна. Хаалттай ХК-ийн хувьд хувьцааг иргэнээс иргэнд арилжина гэсэн ойлголт байдаггүйг анхаараарай. Хэний ч хувьцаа хэн рүү шилжихгүй.