Говь-Алтай аймагт 30 настай эмэгтэй машиндаа нас барсан хэргийн талаар ЦЕГ-аас өнөөдөр мэдээлэл өглөө.

ЦЕГ-ын Хэвлэл мэдээллийн төвийн мэргэжилтэн, цагдаагийн ахмад М.Мөнхшүр "Өнөөдөр буюу хоёрдугаар сарын 19-ний үүрийн 04 цаг 20 минут орчимд Говь-Алтай аймгийн Есөн булаг суманд иргэн автомашиндаа нас барсан байна гэсэн дуудлага цагдаагийн байгууллагад ирсэн. 

Тус дуудлагын дагуу Говь-Алтай аймгийн Цагдаагийн газрын жижүүрийн бүрэлдэхүүн хэргийн газарт ажиллалаа. Хэргийн газарт 30 настай эмэгтэй Б нас барсныг тогтоосон, шалгалтын ажил үргэлжилж байна. 

Урьдчилсан байдлаар аймгийн Засаг дарга, удирдлагууд болон нэр бүхий субъектууд аймгийн Засаг даргын ямар нэгэн өрөөнд согтууруулах ундаа хэрэглэсэн байж болзошгүй гэсэн нөхцөл тогтоогдож, шалгалт хийгдэж байна. 

Талийгаач Б-ийн нас барсан шалтгааныг тогтоолгохоор шүүх эмнэлэгт задлан шинжээчийг томилсон. Дүгнэлт гарахыг хүлээж байна. 

Хэрэв өндөржүүлсэн бэлэн байдалд буй энэ үед бүлэг, бөөгнөрөл үүсгэж архидан согтуурсан нь тогтогдох юм бол хариуцлагыг тухайн эрх бүхий субъектэд хүлээлгэнэ. Шалгалт, байцаалт үргэлжилж буй учир хэнийг цагдан хорьсон болон гэм буруугийн асуудлыг ярих боломжгүй" хэмээлээ.