"Ногдол ашгаа бэлэн мөнгөөр авъя” цахим бүртгэлийн аяныг 1072 хувьцаа эзэмшигчид санаачилжээ. Тус аян ирэх сарын 20 хүртэл үргэлжлэх бөгөөд хувьцаа эзэмшигчдээс ирсэн саналыг нэгтгэн “Эрдэнэс Тавантолгой” компанийн Төлөөлөн удирдах зөвлөлд хүргүүлэх юм байна.

Цахим аянд нэгдэхийг хүссэн иргэд www.1072.mn сайтад бүртгүүлж, саналаа баталгаажуулах аж. Тэд өөрсдийн эрх ашиг, хүсэл сонирхлын дагуу нэгдсэн төдийгүй 1072 хувьцаа эзэмшигчдийн эрх ашгийг хамгаалах холбоонд мөн ханджээ. Одоогийн байдлаар 50 гаруй мянган хувьцаа эзэмшигч дээрх аянд нэгдэв. 

УИХ-ын Өргөдлийн байнгын хорооны хуралдаанаар “Эрдэнэс Тавантолгой”-н 1072 хувьцаа эзэмшигчдэд 2019 оны компанийн ашгаас ногдол ашиг хуваарилах тухай шийдвэр гаргаж, үүнийг Засгийн газар болон холбогдох компанид үүрэг болгосон. Тэгвэл Уул уурхай, хүнд үйлдвэрийн сайд Д.Сумъяабазар “Цагаан сараас өмнө ногдол ашиг олгох эсэхийг шийднэ. Компанийн тухай хуулиар хоёрдугаар сарын 15-ны дотор шийдвэр гарсан байх ёстой” хэмээн энэ сарын 21-нд болсон “Ил тод, хариуцлагатай уул уурхай” хэвлэлийн бага хурлын үеэр олон нийтэд мэдэгдсэн юм. “Эрдэнэс Тавантолгой” компани 2019 онд нэг тэрбум ам.долларын борлуулалтын орлоготой ажилласан билээ. Тодруулбал, тус компани тайлант хугацаанд 13.7 сая тонн нүүрс экспортолж, улсад 660 тэрбум төгрөгийн татвар хураамж төвлөрүүлсэн төдийгүй цэвэр ашгийн хэмжээ нь нэг их наяд төгрөгт хүрчээ. 


Share