Ой тогтоолтын спортын Дэлхийн холбооноос зохион байгуулсан 34 дэх удаагийн Ой тогтоолтын дэлхийн аварга шалгаруулах тэмцээн амжилттай болж өндөрлөлөө. Тус тэмцээнд дэлхийн 15 улсын 169 шилдэг тамирчин харааны болон сонсголын ой тогтоолтын төрлүүдээр оюун ухаанаа сорин өрсөлдсөн байна.

Энэ удаагийн дэлхийн аваргад Монгол Улсын тамирчин, Олон улсын Их мастер О.Наранзул онцгой амжилт үзүүлж, 8,225 оноо цуглуулан Өсвөрийн дэлхийн аваргын цом хүртсэнээс гадна, нийлбэр дүнгээр насанд хүрэгчдийн ангилалд тэргүүлж, 2025 оны Дэлхийн аварга боллоо. Тэрбээр ийнхүү дэлхийн аваргын алтан медаль хүртэж, 10 сая төгрөгийн шагналын эзэн болжээ.

О.Наранзулын амжилтуудаас дурдвал:

• 2024 он – Мемори лигийн улсын аварга

• 2024 он – Оюуны олимпын аварга

• 2025 он – Ой тогтоолтын улсын аварга

• 2025 он – Ой тогтоолтын дэлхийн аварга

Ийнхүү О.Наранзул нь Монгол Улсаас нийлбэр дүнгээр дэлхийн аварга болж буй дөрөв дэх тамирчин болж, Монголын оюуны спортын түүхэнд нэрээ мөнхөллөө. Түүний энэхүү амжилт нь Монголын ой тогтоолтын спортын хөгжил, олон улсын тавцан дахь нэр хүндийг шинэ түвшинд гаргасан бахархалт үйл явдал боллоо.